საქართველოში ყოველწლიურად ასობით ძაღლი და კატა რჩება ქუჩაში იმის გამო, რომ ცხოველის აყვანისას მეპატრონეს არ აქვს გააზრებული, შეძლებს თუ არა მის მოვლას. შინაურ ცხოველებს ტოვებენ ქუჩებში, გზებზე, სასაფლაოებზე, მიტოვებულ ადგილებში, სადაც მათ შიმშილით და სიცივით სიკვდილი ემუქრებათ.
სწორედ ამ პრობლემას ეხმიანება საქართველოს საკომუნიკაციო სააგენტოების ასოციაციის [ACAG] ორგანიზებული პოსტერების კონკურსი, რომლის ფარგლებში კონკურსის მონაწილეებს უნდა შეექმნათ პოსტერი, რომელიც მოუწოდებს ოჯახებს პასუხისმგებლიანი გადაწყვეტილებისკენ, დაფიქრებისა და გააზრებისკენ, სანამ შინაური ცხოველის ყიდვას/ყოლას დააპირებენ.
კონკურსში წარმოდგენილ ნამუშევრებს შორის სპეციალურად მოწვეულმა ჟიურიმ საუკეთესოები უკვე გამოავლინა.
„ასოციაცია ხშირად ატარებს მსგავსი ტიპის კონკურსებს. ჩვენ მაქსიმალურად ვცდილობთ, კონკურსი იყოს აქტუალურ თემაზე. ვთვლით, რომ შინაური ცხოველების პრობლემები ძალიან მნიშვნელოვანია და ის ყველას გვეხება, ამიტომაც გადავწყვიტეთ კონკურსის ჩატარება შინაური ცხოველების სათამაშოებთან გაიგივების პრობლემაზე,“ – ამბობს ლუკა ეჯიბია, ACAG-ის პროექტების მენეჯერი.
მან ასევე გვითხრა, რომ პოსტერები გავრცელდება სოციალურ ქსელებში:
„ასევე, გვექნება თავისუფალი ბმული, საიდანაც ადამიანები შეძლებენ საბეჭდი მასალის აღებას, დაბეჭდვას და თავიანთ სამუშაო სივრცეში, სახლში თუ სხვაგან ამ პოსტერის გაკვრას. გარდა ამისა, ასოციაცია დაბეჭდავს გამარჯვებულ პოსტერებს და მას თბილისის სხვადასხვა წერტილში გამოაკრავს“.
I ადგილი – Saatchi&Saatchi Tbilisi
II ადგილი – Redberry
III ადგილი – BRID
III ადგილი – ABK
Gepra – ალტერნატიული ჟიურის რჩეული
კონკურსში სულ 17 სააგენტო მონაწილეობდა. ნახეთ კონკურსისთვის შემქნილი რამდენიმე ნამუშევარი.
სააგენტო Kraken-ის პოსტერი
Windfor’s-ის პოსტერი
Socialsharks-ის პოსტერი
