შპს „პარკ გიდამ“, რომელიც ქართულ ბაზარზე 2016 წლიდან ალკოჰოლური სასმელებით ოპერირებს, საწარმოო ხაზი შეცვალა. კომპანიამ მარტის დასაწყისიდან ალკოჰოლური სასმელების წარმოება შეწყვიტა და საწარმო სადეზინფექციო საშუალებების დასამზადებლად გადააწყო [ეს საწარმო ქობულეთის მუნიციპალიტეტში ფუნქციონირებს].
პროდუქტმა შესაბამისი შემოწმება გაიარა და სერტიფიკატიც მიიღო. ვარგისიანობას აკრედიტებული ლაბორატორია „ნორვა“ აკონტროლებს.
სადეზინფექციო საშუალებები მარკეტებში უკვე შეიტანეს, ხოლო მას შემდეგ, რაც ხსნარს ოფიციალურად დაარეგისტრირებენ, შპს „პარკ გიდას“ ხელის სადეზინფექციო ხსნარი და გელი აფთიაქებშიც გამოჩნდება.
პროდუქტის დასამზადებლად საჭირო ნედლეული კომპანიას უცხოეთიდან შემოაქვს: „ ხორბლის სპირტი ბულგარეთიდან შემოგვაქვს“.
კომპანიის ინფორმაციით დაახლოებით 6000 ერთეული სადეზინფექციო ხსნარი [300 მილი ლიტრიანი შეფუთვით] აჭარის ჯანდაცვის სამინისტროს უსასყიდლოდ გადაეცემა: „ გარკვეული რაოდენობა გადავეცით, ასევე, სურსათის უვნებლობის სამსახურს. ასევე ვფიქრობთ, რომ საჭიროების შემთხვევაში გავზრდით მთავრობისთვის გადასაცემი ხსნარების ოდენობასაც,“ – ამბობს ნათია ლომინაძე, კომპანიის ხარისხის კონტროლის სპეციალისტი.
შპს „პარკ გიდა“ საქართველოში 2012 წელს თურქეთის მოქალქე ლევენთ გარიფოღლუმ დააფუძნა და დღემდე ის კომპანიის ასივე პროცენტის მფლობელია.
