Batumelebi | ბათუმში 19 შენობას ძეგლის სტატუსი მიანიჭეს ხუთწლიანი ლოდინის შემდეგ  ბათუმში 19 შენობას ძეგლის სტატუსი მიანიჭეს ხუთწლიანი ლოდინის შემდეგ  – Batumelebi

ბათუმში 19 შენობას ძეგლის სტატუსი მიანიჭეს ხუთწლიანი ლოდინის შემდეგ 

ხუთწლიანი ლოდინის შემდეგ კულტურული მემკვიდრეობის დაცვის სააგენტოს ძეგლების საბჭომ ბათუმში „გეოგრაფიკის“ რეკომენდებული 23 სახლიდან 19-ს კულტურული მემკვიდრეობის ძეგლის სტატუსი მიანიჭა.

ამ შენობებთან დაკავშირებით დადებითი გადაწყვეტილება საბჭომ 13 მარტს მიიღო. შესაბამისი ოქმის მოპოვება კი მხოლოდ დღეს, 19 მარტს, შევძელით. ოქმის მიხედვით, დარჩენილი 4 სახლისთვის სააგენტომ სტატუსის მინიჭებაზე იმ მოტივით თქვა უარი, რომ „შენობებს აღარ აქვთ შემორჩენილი ძეგლის ავთენტური ნიშნები“.

ძეგლის სტატუსის მისანიჭებლად წარდგენილი სახლები კომპანია „გეოგრაფიკმა“ ბათუმის მერიის დაკვეთით 2015 წელს შეარჩია. 2015 წლიდან 2019 წლამდე ბათუმის მერიას, აჭარის კულტურული მემკვიდრეობის დაცვის სააგენტოსა და ეროვნულ სააგენტოს შორის გრძელვადიანი გადარჩევა-დაზუსტების შემდეგ, სააგენტომ 2019 წლის მარტში ამ სახლებს კულტურული მემკვიდრეობის ობიექტის სტატუსი მიანიჭა. შესაბამისად, დარჩენილი იყო ბოლო ეტაპი – შენობებისთვის ძეგლის სტატუსის მინიჭება, რასთან დაკავშირებითაც საბჭოს გადაწყვეტილება ექვს თვეში უნდა მიეღო, თუმცა ეს ვადა გაახანგრძლივეს.

კულტურული მემკვიდრეობის ობიექტის სტატუსის მინიჭების შემდეგ კონკრეტული შენობების მიმართ კულტურული მემკვიდრეობის დაცვის შესახებ კანონით გათვალისწინებული ყველა დამცავი რეჟიმი ამოქმედდა, სტატუსის მინიჭების შემდეგ  კი შენობებს ხელყოფისგან, ასევე, კანონი იცავს.

შენობები ბათუმში, რომლებსაც ძეგლის სტატუსი მიენიჭა:

ლუკა ასათიანის ქუჩის N15 -სა და მემედ აბაშიძის N44 -ში მდებარე შენობა

საცხოვრებელი სახლი, ბათუმი, მ. აბაშიძის ქ.N11 – ორსართულიანი შენობა XX საუკუნის დასაწყისშია აშენებული

 

მ.აბაშიძის 17 – კინოთეატრ „ აპოლოს“ შენობა

საცხოვრებელი სახლი, ბათუმი, ვაჟ- ფშაველას #25

ძეგლის სტატუსი ახვლედიანის ქუჩაზე მიენიჭა #2-სა და #15- ში მდებარე სახლებს

ბათუმი. ახვლედიანის ქუჩა #15

საცხოვრებელი სახლი, ბათუმი, კლდიაშვილის N5

კლდიაშვილის ქუჩაზე ძეგლის სტატუსი მიენიჭა კიდევ ორ  – # 10-სა და #34 -ში მდებარე სახლებს. ძეგლის სტატუსი მიანიჭეს ასევე საცხოვრებელ სახლებს შემდეგ მისამართებზე: კომახიძის II შესახვევი N6; მაზნიაშვილის N48; თავდადებულის N8; თავდადებულის N13; თავდადებულის N41/ ფარნავაზ მეფის N63; ჭავჭავაძის N68; გორგასლის N21.

ძეგლის სტატუსი არ მიენიჭა ოთხ სახლს, ესენია: საცხოვრებელი სახლი ბათუმში 9 მარტის ქუჩაზე, N3- ში, მ. აბაშიძის N62 -ში მდებარე სახლი, კლდიაშვილის N12/ ვაჟა-ფშაველას ქ.N12-ში მდებარე შენობა და ბათუმში, რუსთაველის N7.

____________

მთავარ ფოტოზე: სახლი ვაჟა-ფშაველასა და კლდიაშვილის ქუჩების კვეთაში, რომელსაც კულტურული მემკვიდრეობის ძეგლის სტატუსი მიანიჭეს

ნეტგაზეთის მასალების სხვა გამოცემებში გადაბეჭდვის წესი
ავტორი