კანადის პრემიერ-მინისტრ ჯასტინ ტრუდოს თქმით, ყველა მტკიცებულება მიუთითებს, რომ “უკრაინის საერთაშორისო ავიახაზების” სამგზავრო თვითმფრინავი თეირანში ირანის ანტისარაკეტო თავდაცვის სისტემამ მიწა-ჰაერის ტიპის რაკეტით ჩამოაგდო.
როგორც კანადის საზოგადოებრივი მაუწყებელი (CBC) იუწყება, კანადამ ტრაგედიის შესახებ დამატებითი ინფორმაცია მიიღო ამერიკული დაზვერვისგანაც.
ამერიკული მედიასაშუალება Newsweek განსხვავებულ წყაროებზე დაყრდნობით წერს, რომ “უკრაინის საერთაშორისო ავიახაზების თვითმფრინავი” თეირანის სიახლოვეს შეცდომით ჩამოაგდეს ირანის ანტისარაკეტო თავდაცვის სისტემით. როგორც გამოცემა წერს, ეს ინფორმაცია მათ ამერიკის შეერთებული შტატების დაზვერვის სამსახურისა და პენტაგონის სამი მაღალჩინოსნისგან ანონიმურად მიიღეს.
Newsweek-ის ცნობით, წყაროებმა მას განუცხადეს, რომ უკრაინული სამგზავრო თვითმფრინავი რუსული წარმოების სარაკეტო სისტემის – Tor-M1-ის გამოყენებით ჩამოაგდეს, რომელსაც NATO-ში Gauntlet-ის სახელით იცნობენ.
“უკრაინის საერთაშორისო ავიახაზების” ბოინგ 737-800 8 იანვარს, გამთენიისას ჩამოვარდა ირანის დედაქალაქ თეირანთან ახლოს. დაიღუპა ბორტზე მყოფი 176 ადამიანი. უკვე ცნობილია, რომ გამოძიებისთვისთვის სასიცოცხლოდ მნიშვნელოვან მასალებს – ე.წ. შავ ყუთებს – ირანი არ გადასცემს უკრაინასა და ბოინგს.
უკრაინის საგარეო საქმეთა სამინისტროს ცნობით, დაღუპულებს შორის არის ირანის 82, კანადის 63, უკრაინის 11 (მათგან ეკიპაჟის 9 წევრი), შვედეთის 10, ავღანეთის 4, ბრიტანეთის 3 და გერმანიის 3 მოქალაქე.
ამ თემაზე:
https://netgazeti.ge/news/418935/?fbclid=IwAR0QIk30QxZsKrqLqLpVkaKsYYcU048VcuOZMGgttR56qYvPZBH3ic5T0WA
