ნეტგაზეთი • RU

ბათუმის “დინამოს” ფინანსური მენეჯერი ნარკოტიკის შეძენა-შენახვის ბრალდებით დააკავეს

 

საფეხბურთო კლუბ “ბათუმის დინამოს” ფინანსურ მენეჯერს უფლებამოსილება შეუჩერდა. ის ნარკოტიკების შეძენა-შენახვის გამო დააკავეს. ბრალდებულის საქმეს ბათუმის საქალაქო სასამართლო განიხილავს.

 

ბრალდებული ემზარ ხალვაში პატიმრობიდან გირაოს საფუძველზეა გათავისუფლებული, მის უფლებებს ადვოკატი ჯემალ კიკნაძე იცავს. სასამართლო პროცესზე ადვოკატმა განაცხადა, რომ ყველა მტკიცებულებას, რომელიც საქმეს ერთვის და გამოძიების მოპოვებულია, სადაოდ ხდის.

 

“დინამოს” ფინანსური მენეჯერი 20 აგვისტოს დააკავეს. როგორც სასამართლო პროცესზე ბრალდების მხარემ განმარტა _ დიდი ოდენობით ნარკოტიკული ნივთიერების შეძენა-შენახვის ბრალდებით. პროკურორის თქმით, ნარკოტიკული ნივთიერება ბრალდებულის საცხოვრებელი სახლის ჩხრეკის დროს იპოვეს. მოსამართლის განმარტებით, ეს ბრალდება 5-დან 8 წლამდე პატიმრობას ითვალისწინებს.

 

ბრალდებული სასამართლო პროცესზე დუმილის უფლებით სარგებლობს. ემზარ ხალვაში დაახლოებით 2 თვეა “ბათუმის” დინამოს ფინანსური მენეჯერი აღარ არის. მომდევნო სასამართლო პროცესი   მოწმეების დაკითხვით გაგრძელდება. საქმეს მოსამართლე თამარ ბეჟანიშვილი განიხილავს, საქმის პროკურორი კი ლევან მურვანიძეა.

ნეტგაზეთის მასალების სხვა გამოცემებში გადაბეჭდვის წესი
ნათია როყვა