დღეს, 27 მარტს, აჭარის მთავრობის სახლის წინ „ნაციონალური მოძრაობის“ წევრებმა, ასევე, მათ მიერ შექმნილმა „აჭარის ალტერნატიული მთავრობის“ წარმომადგენლებმა, აქცია გამართეს.
აქციაზე გამოფენილი იყო იმ 21 პროექტის ფოტო, რომლებიც, მათი განცხადებით, „ქართული ოცნების“ მთავრობამ დაიწყო, მაგრამ ვერ დაასრულა.
„ეს ფოტოები ასახავს ბიძინა ივანიშვილის კორუფციულ პროექტებს აჭარაში. ამ პროექტებზე მთლიანობაში დახარჯულია ასი მილიონი ლარი და ყველა საქმე გადაგზავნილია პროკურატურაში შესასწავლად.
გახარჯულია ხალხის ფული, თუმცა ამ ყველაფერზე მთავრობისგან პასუხი არ არის“, – ამბობს „აჭარის ალტერნატიული მთავრობის“ წარმომადგენელი, ანრი გუბაევი.
ფოტო: ლელა დუმბაძის
აქცია დღის ბოლომდე გაგრძელდება მთავრობის სახლის წინ. ანრი გუბაევის თქმით, მსგავსი აქციების გამართვა ყველა სამთავრობო უწყების წინ იგეგმება.
ფოტო: ლელა დუმბაძის
მთავარი ფოტო: აქციაზე გამოფენილია იმ 21 პროექტის ფოტო, რომლებიც, ორგანიზატორების თქმით, მთავრობამ ვერ დაასრულა.