მთავარი,სიახლეები

ბათუმში ფარული კადრების საქმეზე დაკავებულ სამივე პირს გირაო შეეფარდა

03.02.2019 • 1634
ბათუმში ფარული კადრების საქმეზე დაკავებულ სამივე პირს გირაო შეეფარდა

პირადი ცხოვრების ამსახველი კადრების საქმეზე დაკავებული 17 პირიდან სასამართლომ სამს პატიმრობა შეუფარდა, დანარჩენს კი – გირაო. ამ საქმეზე ბათუმში დაკავებულ სამივე პირს, ინგა და ირმა ხოროიშვილებსა და ირაკლი ქასრაშვილს გირაო შეეფარდათ.

დები ხოროიშვილების ინტერესს სასამართლოში „ნაციონალური მოძრაობის“ წევრი, მირდატ ქამადაძე იცავს, რომელიც გუშინ ჩაერთო საქმეში, როგორც ადვოკატი.

მირდატ ქამადაძის თქმით, გუშინ, გვიან საღამოს გამართულ სასამართლოზე, რვიდან შვიდ პირს გირაო შეეფარდა და ერთს, რომელსაც გავრცელებული ინფორმაციით, კადრების „იუთუბზე“ ატვირთვა ედება ბრალად – პატიმრობა, მიუხედავად იმისა, რომ პროკურორი შვიდი პირის მიმართ ითხოვდა პატიმრობას და ერთის მიმართ – გირაოს.

„ინგა ხოროიშვილთან მიმართებაში პროკურატურამ მოითხოვა გირაო – 3 000 ლარი, ჩვენ მოვითხოვეთ 1 000 ლარი და სასამართლომ მას შეუფარდა გირაო – 2 ათასი ლარი. ინგა უკვე თავისუფალია. ირმა ხოროიშვილს 10 ათასი ლარი შეეფარდა გირაო, პროკურატურა ითხოვდა პატიმრობას და სასამართლომ დააკმაყოფილა ჩვენი მოთხოვნა“, – განაცხადა „ბათუმელებთან“ მირდატ ქამადაძემ.

მისივე თქმით, დაკავებული 17 პირიდან პროკურატურა ითხოვდა ათის პატიმრობას და შვიდის მიმართ გირაოს.

„პროკურატურა ითხოვდა პატიმრობას მათ მიმართ, ვისაც ბრალი ედებოდა შენახვასა და ამასთანავე გავრცელებაშიც. ხოლო ვისაც მხოლოდ შენახვაში ედებოდა ბრალი, ანუ ვგულისხმობ, ვისაც მხოლოდ ტელეფონში ჰქონდა და არავისთან გაუგზავნია, მათ მიმართ ითხოვდა გირაოს. საბოლოოდ სასამართლომ მხოლოდ სამ პირს შეუფარდა პატიმრობა, დანარჩენებს კი – გირაო“, – ამბობს მირდატ ქამადაძე.

გადაბეჭდვის წესი


ასევე: