“მეორე ტურში შევძლებთ ამომრჩევლის დარწმუნებას,”- განაცხადა მთავრობის სხდომის გახსნისას თორნიკე რიჟვაძემ, აჭარის მთავრობის თავმჯდომარემ, დღეს, 31 ოქტომბერს. მან სხდომა არჩევნების შედეგზე საუბრით დაიწყო და იმედი გამოთქვა, რომ “ქართული ოცნება” მეორე ტურში გაიმარჯვებს.
თორნიკე რიჟვაძემ ხაზი გაუსვა არჩევნების დემოკრატიულად ჩატარებას და ამაზე არჩია აქცენტის გაკეთება, ვიდრე იმაზე, თუ რატომ არ დაუჭირა ხალხმა მხარი მმართველ პოლიტიკურ ძალას.
“მეორე ტური ასეთივე დემოკრატიულ გარემოში ჩატარდება და ამის გარანტი იქნება “ქართული ოცნება”, – თქვა თორნიკე რიჟვაძემ.
აჭარის მთავრობის თავმჯდომარემ ასევე აღნიშნა, რომ მთავრობას მეტი კომუნიკაცია ექნება ხალხთან.
აჭარის მთავრობა დღევანდელ სხდომაზე წინა სამი კვარტლის ანგარიშს, ასევე 2019 – 2021 წლების პრიორიტეტების დოკუმენტს განიხილავს. თორნიკე რიჟვაძემ მოკლედ წარმოადგინა ციფრები, თუ როგორი გადაჭარბებით შესრულდა ბიუჯეტი.
სხდომა ჟურნალისტებისთვის ტრადიციულად დაიხურა. მედია მთავრობის წევრების კომენტარს ისევ დახურულ კარს მიღმა ელის.
