ნეტგაზეთი • RU

მსოფლიო საჭადრაკო ოლიმპიადის საორგანიზაციო კომიტეტი მოხალისეებს იწვევს

2018 წლის მსოფლიო საჭადრაკო ოლიმპიადის საორგანიზაციო კომიტეტი 43-ე საჭადრაკო ოლიმპიადის ფარგლებში თანამშრომლობისთვის 18-30 წლის ახალგაზრდებს მოხალისეებად იწვევს. მოხალისეთა შერჩევა მოხდება სარეგისტრაციო ფორმით და გასაუბრებით. მოხალისეთა რაოდენობა შეზღუდულია.

  • მოხალისე სრულყოფილად უნდა ფლობდეს ქართულ ენას, დამატებითი ენის ცოდნა მიიჩნევა პრიორიტეტად.
  • სამუშაო დრო არ აღემატება 8 საათს, თუმცა ის დღე-ღამის ყველა მონაკვეთს მოიცავს სხვადასხვა სივრცეში – აეროპორტი, სასტუმრო, სათამაშო დარბაზი და ა.შ.
  • არასამუშაო დროს მოხალისეები ერთვებიან ერთიან, სპეციალურად ოლიმპიადისთვის დაგეგმილ სხვადასხვა პარალელურ აქტივობაში.
  • მოხალისეები უზრუნველყოფილნი იქნებიან კვებითა და საცხოვრებელი ადგილით (საჭიროების შემთხვევაში).

43-ე საჭადრაკო ოლიმპიადა ბათუმში 2018 წლის 23 სექტემბერს დაიწყება და 6 ოქტომბერს დასრულდება.

საორგანიზაციო კომიტეტის ინფორმაციით, „ოლიმპიადის პარალელურად იმართება ფიდესა და კონტინენტთა პრეზიდენტების არჩევნები, 89-ე კონგრესი და სხვა მნიშვნელოვანი საჭადრაკო ღონისძიებები.

43-ე საჭადრაკო ოლიმპიადაში მონაწილეობენ 190-მდე ქვეყნის ვაჟთა და ქალთა გუნდები.

მოჭადრაკეები, კაპიტნები, არბიტრები, თანმხლები პირები, კონგრესის დელეგატები, უცხოელი ჟურნალისტები საქართველოს 21 სექტემბრიდან ეწვევიან. ფრენები განხორციელდება საქართველოს სამივე აეროპორტში – ბათუმში, ქუთაისსა და თბილისში.

გახსნის საზეიმო ცერემონიალი გაიმართება 23 სექტემბერს ბლექ სი არენაზე, ხოლო დახურვა – 5 ოქტომბერს ბათუმის სახელმწიფო მუსიკალურ ცენტრში.“

მოხალისეთა რეგისტრაცია მიმდინარეობს ვებგვერდზე: batumi2018.fide.com

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com