ოჯახში ძალადობის ერთ საქმეზე, სადაც ბრალდებული სამი ადამიანი იყო, მოსამართლე დავით მამისეიშვილმა განაჩენი გამოიტანა. ძალადობას რამდენიმე ეპიზოდში დაზარალებული ქალის ყოფილ ქმარს, დედამთილსა და მულს ედავებოდა გამოძიება. ბათუმის საქალაქო სასამართლომ ყოფილი ქმარი გაამართლა, მული და დედამთილი კი, 500-500 ლარით დააჯარიმა.
დაზარალებული ქალის ჩვენებით, მას არაერთხელ სცემეს ჯგუფურად შვილების თანდასწრებით. ოჯახი ქობულეთის ერთ-ერთ სოფელში ცხოვრობს. განქორწინების შემდეგ ისინი საერთო საცხოვრებელ სახლში დარჩნენ. დედამ ორ შვილთან ერთად განაგრძო ცხოვრება, სახლის მეორე მხარეს კი, ყოფილი მეუღლე, დედამთილი და მული დარჩნენ. რამდენიმე მოწმის ჩვენების მიხედვით, ოჯახში კონფლიქტი მას შემდეგ გააქტიურდა, როცა თემურმა სხვა ქალი მოიყვანა ცოლად – საკუთარი გათხოვილი შვილის მული.
ადვოკატის, რამაზ ჯორბენაძის თქმით, ყოფილი ქმრის მხრიდან ოჯახში ძალადობის შემთხვევა არ დადასტურდა, მული და დედამთილი კი, ერთ ეპიზოდში მიიჩნია სასამართლომ დამნაშავედ. ადვოკატის თქმით, დაზარალებული ქალი ისევ ყოფილი ქმრის სახლში ცხოვრებს.
