ბრალდებული ადრე ნასამართლევია ასევე ქურდობისთვის, ის თავისუფლებაში პირობითი მსჯავრით იმყოფებოდა. პროკურორის ინფორმაციით, მან სწორედ პირობითი სასჯელის დროს ჩაიდინა ახალი დანაშაული – ისევ მოიპარა.
როგორც მოსამართლეს პროკურორმა ლევან მურვანიძემ უთხრა, ბრალდებულმა 10 აგვისტოს ბათუმში, ჯავახიშვილის ქუჩაზე მდებარე სასურსათო მაღაზიის საცავში შეაღწია და მოიპარა 128 ლარი. ეს ბრალდება 4-დან 7 წლამდე პატიმრობას ითვალისწინებს. გარდა ამისა, დაკავებულს ბრალი ედება სხვისი ქონების დაზიანებაში. ბრალდების მტკიცებით, მან ქვით ჩაამტვრია მაღაზიის მინა და ამ გზით შეაღწია მაღაზიაში. მინის ჩამტვრევით გამოწვეული ზარალი 260 ლარია. ადვოკატის ინფორმაციით, დაზარალებულს ზარალი უკვე აუნაზღაურეს.
სხვისი ქონების დაზიანება ერთიდან სამ წლამდე პატიმრობას ითვალისწინებს. იმ არგუმენტით, რომ ბრალდებული არ მიიმალოს, კიდევ ახალი დანაშაული არ ჩაიდინოს და ხელი არ შეუშალოს მტკიცებულებების მოპოვებას, პროკურორმა მისი პატიმრობა მოითხოვა.
ადვოკატმა თენგიზ კახიძემ თქვა, რომ დაცვის მხარე სადავოდ არ ხდის პროკურატურის მიერ მოპოვებულ მტკიცებულებას, მისი დაცვის ქვეშ მყოფი აღიარებს და ინანიებს ჩადენილ დანაშაულს. ადვოკატის თქმით, არსებული მტკიცებულების (საქმეში დევს სათვალთვალო კამერიდან ამოღებული ჩანაწერი) განადგურება რომც მოინდომოს ბრალდებულმა, ამას ვერ შეძლებს, რადგან ეს მასალა უკვე საცავშია ჩაკეტილი. ადვოკატის მტკიცებით, საქმეში არ არსებობს მოწმე, თვითმხილველი, რომელზეც შესაძლოა ბრალდებულმა ზეგავლენა მოახდინოს, ამიტომაც ის აღკვეთი ღონისძიების სახით, გირაოს _ 4 ათასი ლარის შეფარდებას ითხოვდა, თუმცა მოსამართლემ დაცვის მხარის შუამდგომლობა არ დააკმაყოფილა.
