Batumelebi | აგროსერვისცენტრის მაგალითის გადაღება სხვა რეგიონებშიც იგეგმება აგროსერვისცენტრის მაგალითის გადაღება სხვა რეგიონებშიც იგეგმება – Batumelebi
RU | GE  

აგროსერვისცენტრის მაგალითის გადაღება სხვა რეგიონებშიც იგეგმება

 

16 სექტემბერს აგროსერვისცენტრის დირექტორი გოჩა ბერიძე გაეროს განვითარების პროგრამის კონსულტანტ სტივ გოსსა და „ენპარდ აჭარას“ პროექტის მენეჯერ ლაშა კომახიძეს შეხვდა.  აგროსერვისცენტრის პრესსამსახურის ცნობით  შეხვედრაზე განიხილეს დოკუმენტი, რომელსაც სტივ გოსი აგროსერვისცენტრში განხორციელებულ პროექტებზე დაყრდნობით ამზადებს. 

 

დოკუმენტი, რომელიც საქართველოს სოფლის მეურნეობის სამინისტროში წარსადგენად მზადდება,  ეხება აგროსერვისცენტრის, როგორც წარმატებული ორგანიზაციის მოდელის გადაღებას საქართველოს სხვადასხვა რეგიონში. გაეროს განვითარების პროგრამის კონსულტანტმა  აგროსერვისცენტრის დირექტორისგან მიიღო რეკომენდაციები, თუ როგორ და რა ფორმითაა უმჯობესი აგროსერვისცენტრის მსგავსი ორგანიზაციის დუბლირება და პროექტების განხორციელება სხვა რეგიონებში.

 

„მსგავსი ორგანიზაციის მოდელის შექმნისას მთავარი მიმართულება უნდა იყოს ექსტენცია, რადგან დღეისათვის მთავარ პრობლემას მაინც ფერმერთა ცნობიერებისა და კვალიფიკაციის ამაღლება წარმოადგენს. რისთვისაც უნდა დაიგეგმოს ტრენინგები, გადამზადდეს სპეციალისტები, ორგანიზება გაეწიოს როგორც სპეციალისტებისთვის, ასევე სტუდენტების გაცვლით პროგრამებსა და სტაჟირებებს.  აგროსერვისცენტრის მთავარ უპირატესობას კი წარმოადგენს ჩვენი სერვისების ერთობლიობა.  ჩვენ შეგვიძლია ფერმერს  შევთავაზოთ ნიადაგის ანალიზი, ამავდროულად გავუწიოთ რეკომენდაციები, თუ რომელი კულტურის გაშენებაა უფრო მომგებიანი და სურვილის შემთხვევაში უზრუნველვყოთ ნერგებით. ასევე, ვასწავლოთ და ჩვენს სანერგეებში პრაქტიკული მაგალითით ვაჩვენოთ თუ როგორ მოუარონ თავიანთ საკარმიდამო ნაკვეთებში გაშენებულ ციტრუსს, ვაზსა თუ ხეხილს,“ – განაცხადა აგროსერვისცენტრის დირექტორმა გოჩა ბერიძემ.   

 

შეხვედრაზე, ასევე, განიხილეს გოსის მიერ მომზადებული „აგროსერვისცენტრის“ განვითარების სტრატეგიული გეგმის დოკუმენტიც და „ენპარდ პირველის“ დასრულების სტრატეგიაც.  პროექტს _ „ენპარდ აჭარა- სოფლის მეურნეობის განვითარების ხელშეწყობა აჭარის ავტონომიურ რესპუბლიკაში“ ევროკავშირის დაფინანსებით, გაეროს განვითარების პროგრამა რეგიონში მესამე წელია ახორციელებს. 2016 წლის  აპრილში კი პროგრამა სრულდება და დაგეგმილია მისი მეორე ფაზის დაწყება, რომელიც სოფლის განვითარებას ითვალისწინებს.

 

ნეტგაზეთის მასალების სხვა გამოცემებში გადაბეჭდვის წესი
"ბათუმელები"