Batumelebi | არასამთავრობო ორგანიზაციები ჟურნალისტური საქმიანობის ხელშეშლის ფაქტზე გამოძიებას ითხოვენ არასამთავრობო ორგანიზაციები ჟურნალისტური საქმიანობის ხელშეშლის ფაქტზე გამოძიებას ითხოვენ – Batumelebi
RU | GE  

არასამთავრობო ორგანიზაციები ჟურნალისტური საქმიანობის ხელშეშლის ფაქტზე გამოძიებას ითხოვენ

 

აჭარის ტელევიზიის საინფორმაციო სამსახურის უფროსი შორენა ღლონტი უარყოფს აჭარის სოფლის მეურნეობის სამინისტროს „აგროსერვის ცენტრის“ ექსტენციის სამსახურის უფროსის, მირზა სუქნიშვილის განცხადებას იმის თაობაზე, რომ აჭარის ტელევიზიის რეპორტიორი ლაშა ველიაძე ალკოჰოლის ზემოქმედების ქვეშ იმყოფებოდა იმ დროს, როცა ინციდენტი მოხდა ტელევიზიის გადამღებ ჯგუფსა და აჭარის სოფლის მეურნეობის სამინისტროს თანამშრომლებს შორის. შორენა ღლონტი ამბობს, რომ შემთხვევს დღესვე რეპორტიორსა და ოპერატორს სამხარაულის ექსპერტიზის ბიუროში ჩაუტარეს ექსპერტიზა და არც ერთი მათგანი არ იმყოფებოდა ალკოჰოლის ზემოქმედების ქვეშ. აჭარის ტელევიზიამ ინციდენტის გამოძიების თხოვნით უკვე მიმართა პროკურატურას. საქმის გამოძიებას ითხოვენ არასამთავრობო ორგანიზაციებიც. 

 

„სიცრუეა, თითქოს ჟურნალისტს ხელი შევუშალეთ თავისი საქმიანობის განხორციელებაში, რადგან ჩვენი თანამშრომელი კარლო კეკელიძე 20 წუთის განმავლობაში ამაოდ ცდილობდა არაფხიზელ მდგომარეობაში მყოფი ჟურნალისტისათვის აეხსნა, რომ სამინისტროს ინფორმაციით ღვინის ქარხანას ჯერ კიდევ არ ჰქონდა ყურძნის მიღების ფასები დადგენილი…

ღვინის სახლში ოფიციალური ვიზიტით გვახლდა ბელორუსიის დელეგაცია, რომლებიც გამართული უსიამოვნო დიალოგის გამო უშედეგოდ ელოდებოდნენ ვიზიტის გაგრძელებას, საუბარში ჩავერთეთ მე და ბატონი ავთანდილ მესხიძეც. ჟურნალისტს კიდევ ერთხელ, თუმცა უშედეგოდ, განვუმარტეთ არსებული მდგომარეობა, რამაც ჩვენი მისამართით გამოიწვია ჟურნალისტის აგრესია და სიტყვიერი შეურაცხყოფა, რასაც მოყვა სიტყვიერი შელაპარაკება ჩვენსა და ჟურნალისტს შორის.  …ძალიან ვწუხვარ მომხდარის გამო და ვფიქრობ, რომ ჟურნალისტი ცდილობს შეცდომაში შეიყვანოს საზოგადოება და არაფხიზელ მდგომარეობაში ჩადენილი უსიამოვნო და შეუფერებელი საქციელი ახსნას ჟურნალისტისათვის პროფესიულ საქმიანობაში ხელშეშლად.“ – ეს განცხადება მირზა სუქნიშვილმა 2 სექტემბერს გაავრცელა.  

 

საზოგადოებრივი მაუწყებლის აჭარის ტელევიზიისა და და რადიოს საინფორმაციო სამსახურის უფროსი შორენა ღლონტი „ბათუმელებთან“ საუბრისას ამბობს, რომ ტელევიზიის კორესპონდენტის ლაშა ველიაძის მუშაობის პროცესში ხელის შეშლის სავარაუდო ფაქტზე ტელევიზიამ აჭარის პროკურატურას წერილით უკვე მიმართა. მისივე განმარტებით, 1-ელ სექტემბერს, დაახლოებით 18:00 საათზე, ქედაში, ღვინის ქარხანაში მისულ „ახალი ამბების“ ჯგუფს დახვდნენ აჭარის სოფლის მეურნეობის სამინისტროს თანამშრომლები. სწორედ მაშინ, როცა ჟურნალისტი უწყების ერთ-ერთ თანამშრომელთან ინტერვიუს ათანხმებდა, სიტყვიერი შეურაცხყოფა ფიზიკურ შეხლა-შემოხლაში გადაიზარდა. შემთხვევის ადგილზე ტელევიზიის გადამღები ჯგუფის ყოფნამ მირზა სუქნიშვილი გააღიზიანა. ჟურნალისტი ყვება, რომ მას კეფაში ხელი ჩაარტყეს, თუმცა არ დაუნახია, კონკრეტულად ვინ შეეხო ფიზიკურად.

 

 

„როცა ვესაუბრე სამინისტროს თანამშრომლებს, ისინი აპელირებდნენ იმაზე, რომ ჩვენი ჟურნალისტი იმყოფებოდა ნასვამ მდგომარეობაში. ინციდენტიდან რანდენიმე წუთში თანამშრომლებს ჩავუტარეთ სამხარაულის ექსპერტიზის ბიუროში ექსპერტიზა. ექსპერტების დასკვნის საფუძველზე ჩვენი თანამშრომლები ალკოჰოლის ზემოქმედების ქვეშ არ იმყოფებოდნენ.“ – ამბობს შორენა ღლონტი.

 

შემთხვევას არასამთავრობო ორგანიზაციებიც გამოეხმაურნენ.  

 

საგანგებო განცხადება გაავრცელა საქართველოს ჟურნალისტური ეთიკის ქარტიის საბჭომ:

 

„ეს არ არის სახელმწიფო მოხელეების მხრიდან ჟურნალისტების შეურაცხყოფისა და ხელის შეშლის პირველი შემთხვევა. სამწუხაროდ, ამგვარ ფაქტებს თითქმის არასოდეს მოჰყვება სახელისუფლო ორგანოებისა და ხელისუფლების უმაღლესი პირების სათანადო რეაქცია. რეაგირების გარეშე დატოვებული შემთხვევები, უფრო მეტიც, მედიის მიმართ, უმაღლესი თანამდებობის პირების მხრიდან გამოთქმული ხშირი კრიტიკაც, შეიძლება ითქვას, რომ ახალისებს შედარებით დაბალ იერარქიულ კიბეზე მდგარ ჩინოვნიკებს. ჟურნალისტური ეთიკის ქარტიის საბჭო მიმართავს საქართველოს ხელისუფლებას, იზრუნოს იმაზე, რომ თითოეულ სახელმწიფო მოხელეს გააზრებული ჰქონდეს სიტყვისა და გამოხატვის თავისუფლების მნიშვნელობა და ისეთი დემოკრატიული ინსტიტუტის აუცილებლობა, როგორიც არის მედია.” – აღნიშნულია განცხადებაში.

 

შემთხვევას გამოეხმაურა „საერთაშორისო გამჭვირვალობა – საქართველოც“.

 

„ეს არ არის პირველი შემთხვევა, როდესაც აჭარის სოფლის მეურნეობის სამინისტროს წარმომადგენლები ჟურნალისტებთან არასათანადოდ და კანონის მოთხოვნებთან შეუსაბამოდ იქცევიან. 2013 წლის დეკემბერში 25-ე არხის („ტელეარხი 25“) მაშინდელმა რეპორტიორმა სულხან მესხიძემ მინისტრის მოადგილე ავთანდილ მესხიძე განხორციელებულ მუქარაში დაადანაშაულა (https://goo.gl/okiRfv). ტელევიზიის მიერ ამ ფაქტის გაშუქებას არავითარი რეაგირება არ მოჰყოლია არც თავად მესხიძის უწყების და არც საგამოძიებო სტრუქტურების მხრიდან.

 

„საერთაშორისო გამჭვირვალობა – საქართველო“ მიიჩნევს, რომ ქედაში მომხდარი ფაქტი ჟურნალისტურ საქმიანობაში ხელშეშლის ნიშნებს შეიცავს, რაც საქართველოს სისხლის სამართლის კოდექსით დასჯადი ქმედებაა და მოუწოდებს საგამოძიებო ორგანოებს, რომ ოპერატიულად და ეფექტურად გამოიძიონ მომხდარი ფაქტი.“ – აღნიშნულია ორგანიზაციის მიერ გავრცელებულ განცხადებაში.

 

 

ნეტგაზეთის მასალების სხვა გამოცემებში გადაბეჭდვის წესი
"ბათუმელები"