Batumelebi | როგორი იქნება ”ბათუმობა 2015” როგორი იქნება ”ბათუმობა 2015” – Batumelebi
RU | GE  

როგორი იქნება ”ბათუმობა 2015”

 

წელს მერია „ბათუმობასთან“ დაკავშირებით მოსახლეობასა და ჩამოსულ სტუმრებს ფერად დღესასწაულს ჰპირდება, რომელიც 5-6 სექტემბერს გაიმართება. დღესასწაულის ბიუჯეტი გასული წლისგან განსხვავებით 100 000 ლარით მეტი – 350 000 ლარი იქნება.

მერიის მიერ მოწოდებული ინფორმაციით, „ბათუმობის“ დღესასწაულისათვის მემედ აბაშიძისა და დუმბაძის ქუჩებს ფერადი აქსესუარებით მორთავენ. მემედ აბაშიძის ქუჩა ბიბლიოთეკიდან ევროპის მოედნამდე ჭრელი, განათებული ბურთულებით იქნება მორთული, დუმბაძის ქუჩას კი საჰაერო და სტაციონარული დეკორაციებით გაალამაზებენ, დაკიდებენ ჭრელ ქოლგებსა და ფერად ლენტებს. იგეგმება ხილისა და ყვავილების დეკორაციების, დეკორატიული მინიაუზების დადგმაც. ასევე, დადგამენ ლოლიპოპის ხეს ბავშვებისათვის. ჭრელად შეღებავენ ამ ქუჩების სავალ ნაწილს, ვიტრინებს კი ქაღალდის დეკორაციებით მორთავენ. აქვე განთავსდება სცენა, სადაც ჩატარდება „ბათუმობა 2015“-ის გახსნის ცერემონიალი, პოეტების საღამო, პანტომიმის თეატრისა და თითების თეატრის წარმოდგენა, სამეჯლისო ცეკვები და სხვა ღონისძიებები.

გახსნის ცერემონიალი – „ბათუმობა-2015“-ის ოფიციალური გახსნის ცერემონიალი დუმბაძის ქუჩაზე გაიმართება. გახსნაზე სიგელები გადაეცემათ საპატიო ბათუმელებს. გაიმართება ფურშეტი და ღონისძიებას ჯაზ ბიგ ბენდი გააფორმებს.

აჭარული სოფლის ფესტივალი – ფესტივალი 5-6 სექტემბერს ბათუმობის ფარგლებში გაიმართება. ევროპის მოედანზე დამონტაჟდება სცენა, მიმდებარე ტერიტორიას კი დეკორაციით გააფორმებენ. ევროპის მოედანზე მოეწყობა ასევე ტურისტული მიმართულებების კუთხეები.

ქუჩების შესასვლელი მოეწყობა ისე, როგორც აჭარულ სოფლებშია. მთლიანი ტერიტორია კი სოფლის ერთი დიდი ეზო იქნება, ხის ორღობეებითა და სოფელთან ასოცირებული სხვადასხვა დეკორაციის გამოყენებით. მიწის ნაცვლად ზოგიერთ ადგილს თივით დაფარავენ.

ევროპის მოედანზე განთავსდება ასევე სახლის მაკეტი, შესასვლელში კი იქნება პატარა ნიშნულებით ნაჩვენები, თუ სად რა კუთხეა.
ფესტივალს მუსიკალურად ადგილობრივი ფოლკლორული ჯგუფები გააფორმებენ. საღამოობით კი ღონისძიებას ადგილობრივი ეთნო-ჯაზ, ეთნო-როკ და პოპ ბენდები შეუერთდებიან. გაიმართება თამაშები და თემატური შეჯიბრებები: მაგალითად, შეჯიბრი სიმინდის სწრაფად დარჩევაში, ბაგირის გადაწევაში და ასე შემდეგ. ჩატარდება მასტერკლასები: მონაწილეები შეძლებენ ყველის ამოყვანას, თათარას გაკეთებას და ჩურჩხელის ამოვლებას.

მსოფლიო კინომუსიკის შედევრები – მსოფლიო კინომუსიკის შედევრები ნიკოლოზ რაჭველისა და საქართველოს სახელმწიფო სიმფონიური ორკესტრის საერთო პროექტია. პროგრამაშია ჩარლი ჩაპლინის, ნინო როტას, მიშელ ლეგრანის, ლალო შიფრინისა და გია ყანჩელის ნაწარმოებები.

საჭადრაკო კლუბი ბულვარში – ორი მოჭადრაკე, ევროპისა და საქართველოს მოქმედი ჩემპიონი ნინო ბათიაშვილი და ევროპის ჩემპიონი მირანდა მიქაძე ითამაშებენ ჭადრაკს დიდ დაფაზე, სადაც ფიგურების როლს შესაბამისი საჭადარაკო ფორმებით ბავშვები შეასრულებენ. წარმოდგენა 25 წუთი გაგრძელდება.

საბავშვო სპექტაკლი – საბავშვო სპექტაკლი „ზეიმი ჯადოსნურ სასახლეში“ 5 სექტემბერს ბულვარის კოლონადებთან 17:30 საათზე დაიწყება. საბავშვო მიუზიკლში მონაწილეობას მიიღებს 70 ბავშვი. სპექტაკლი 40 წუთი გაგრძელდება.

თანამედროვე მუსიკის კონცერტი – თანამედროვე მუსიკის კონცერტი 5 სექტემბერს, 19 საათზე, ანბანის კოშკთან გაიმართება. კონცერტში მონაწილეობას ადგილობრივი შემსრულებლები მიიღებენ. კონცერტს მებო ნუცუბიძე და ჯგუფი „BEARFOX“-ი დაასრულებს. დასკვნითი გალაკონცერტი კი ასევე ანბანის კოშკთან, 6 სექტემბერს, 20:00 საათზე დაიწყება.

ღონისძიების ხარჯები – სახალხო დღესასწაულისათვის ქალაქი 350 000 ლარის დახარჯვას გეგმავს. ყველაზე დიდი თანხა, 100 ათასი ლარი გათვალისწინებულია ნიკოლოზ რაჭველისა სიმფონიური ორკესტრის მოსაწვევად – 8 500 ლარი ჰონორარი, 15 ათასი ლარი სასტუმრო და კვება; დარჩენილი ხარჯების შესახებ ინფორმაცია დოკუმენტში არ არის გაწერილი. 42 720 ლარი გათვალისწინებულია გალა კონცერტისთვის, 33 375 ლარი თანამედროვე შემსრულებლებისთვის. სხვა აქტივობებისთვის, მაგალითად, საბავშვო მიუზკლისთვის, მიუზიკლის გაფორმებისა თუ ყვავილებიისთვის – 21 500 ლარი დაიხარჯება. ბათუმობის რეკლამირებისთვის, პროგრამის თანახმად 16 500 ლარია გათვალისწინებული.

ბათუმობაზე  წარმოდგენილნი იქნებიან შემდეგი ჯგუფები და შემსრულებლები:

5 სექტემბერი: Black Sea, Strawberry fields, Hhe Nemo, Sound lab, Groovy Phonics, Rene Band, მეოთხე სეზონი, მებო ნუცუბიძე და ჯგუფი Hhe BearFox.

6 სექტემბერი: კვარტეტი „ნოტა“, ხვიჩა მაღლაკელიძის კვარტეტი, ანსამბლი „ბათუმი“, აჩიკო ბერიძის კვარტეტი, ნანა მესხი, ლაშა ღლონტი, თეატრალური კვარტეტი, ჯგუფი „ფრანი“ და კაროლინა ჩერნეცკა.

საორგანიზაციო ნაწილი – `ბათუმობის~ ორგანიზებისთვის ბათუმის კულტურის ცენტრმა გამარტივებული ელექტრონული ტენდერი ორჯერ გამოცხადა. ტენდერში გამარჯვებულმა კომპანიამ ქუჩების ყვავილებით გაფორმება; პოლიგრაფიული მომსახურება; გახმოვანების აპარატურის უზრუნველყოფა; სცენის უზრუნველყოფა (მონტაჟი-დემონტაჟი); სადემონსტრაციო ეკრანით უზრუნველყოფა; დასკვნითი კონცერტის დასასრულს საზეიმო ფეიერვერკის ორგანიზება; მოწვეული დელეგაციის ტრანსპორტით მომსახურება; სამეცნიერო კონფერენციაზე მოწვეული სტუმრების სასტუმრო ნომრებით და კვებით მომსახურება უნდა უზრუნველყოს. ტენდერის ღირებულება 87 655 ლარია. მანამდე მერიამ ტენდერი სასტუმროს მომსახურებაზე გამოაცხადა და გამარჯვებულიც შეარჩია, თუმცა კომპანიას დისკვალიფიკაცია მისცეს.

გასულ წელს „ბათუმობის“ განრიგი და დაგეგმილი ღონისძიებების ნაწილიც მოულოდნელი წვიმის გამო აირია, უკვე დაანონსებული ღონისძიებები დროში გადაანაცვლეს, რამაც მოსახლეობის უკმაყოფილება გამოიწვია. გარდა ამისა დროზე ადრე დასრულდა დღესასწაულისთვის დაგეგმილი ზოგიერთი ღონისძიება. გასული წლის „ბათუმობის“ შეფასებისას მერმა „ბათუმელებს“ უთხრა, რომ დღესასწაული მოეწონა, თუმცა ხარვეზებიც დაინახა. მერიაში ამბობენ, რომ წელს ამინდის წინასწარი პროგნოზის მონაცემებიც გაითვალისწინეს.

ნეტგაზეთის მასალების სხვა გამოცემებში გადაბეჭდვის წესი
ცაგო კახაბერიძე