Batumelebi | პატიმარი ქსნის მე-19 დაწესებულებიდან სამინისტროს მიმართავს პატიმარი ქსნის მე-19 დაწესებულებიდან სამინისტროს მიმართავს – Batumelebi
RU | GE  

პატიმარი ქსნის მე-19 დაწესებულებიდან სამინისტროს მიმართავს

 

ქსანის მე-19 დაწესებულებაში, რომელიც ცნობილია როგორც პენიტენციური სისტემის ტუბერკულოზის სამკურნალო და სარეაბილიტაციო ცენტრ, სადაც 100-მდე სხვადასხვა ინფექციით დაავადებული მოქალაქე იხდის სასჯელს, აცხადებენ, რომ უკვე სამ თვეზე მეტია არ მუშაობს მაღაზია, რის გამოც ისინი სათანადოდ ვერ იკვებებიან და ვერ იცავენ ჰიგიენას. შესაბამისად, მათ ჯანმრთელობასა და სიცოცხლეს საფთხე ექმნება.

 

ბათუმის მესამე საპყრობილე
ბათუმის მესამე საპყრობილე

„როცა ადმინისტრაციას ვეუბნებით, ამდენ ხანს რატომ არის მაღაზია დახურული, რით ვერ დაამთავრეს ეს ტენდერები, გვეუბნებიან, რომ ეს მათ არ იციან და ზემდგომებს უნდა ვკითხოთ. ეს ზემდგომები ვინ არიან ჩვენ ვერ გავარკვიეთ“, – ყვება ერთ-ერთი პატიმარი.

 

მისი თქმით, სხვადასხვა ინფექციით დაავადებული პატიმრებისთვის სასიცოცხლოდ მნიშვნელოვანია როგორც ჰიგიენური საშუალებები, ისე ნორმალური კვება: „მაღაზიაში ელემენტარული ჰიგიენური საშუალება არ შემოდის. არ გვაქვს არც შესაბამისი საკვები, ტელეფონის კარტები. ტენდერებია და ცოტა უნდა გაუძლოთო, მაგრამ ორი-სამი თვეა ასეთ მდგომარეობაა. აქ დაავადებულები ვართ, ციროზით, ტუბიკით, განუკურნებელი დაავადებით. 100 მსჯავრდებული ვართ და ასივეს ხელმოწერა გვაქვს გაგზავნილი მაღაზიის მუშაობაზე. სახალხო დამცველსაც გავატანეთ წერილი. პასუხები მოგვდის ისეთი, რომ გავარკვეთ და მსგავსი რამ. ზოგიერთი დღეში ვსვამთ 20 წამალს, ქრონიკული ავადმყოფებიც ვართ, ცალკე ფილტვის წამლებს ვსავმთ და ამას კვება უნდა“.

 

პატიმრის თქმით, ძალიან უხერხულია, როცა პატიმარი საპნის ყიდვის უფლებას ითხოვს, მაგრამ მათ სხვა გზა აღარ დარჩათ: „განცხადებები გვაქვს გაგზავნილი საზოგადოებრივ ორგანიზაცებთან და ეს განცხადებები იკარგება. ახლა სახალხო დამცველებს გავატანეთ და იმედი გვაქვს, რომ ეს განცხადებები ყველას მიუვა. ასე ჩვენ სიცოცხლეს ექმნება საფრთხე, რადგან ნამდვილად დამოკიდებული ვართ მაღაზიაზე, წამლების მიღებისთვის ეს აუცილებელია“.

 

სასჯელაღსრულებისა და პრობაციის სამინისტროს პოზიციას პატიმრის განცხადებაზე ამ უწყების პრესცენტრი გამოეხმაურა, რომლის ინფორმაციით, “მას შემდეგ რაც მინისტრა შეიტყო მე-19 დაწესებულებაში არსებული მდგომარეობის შესახებ, დაწესებულების მაღაზიაში შევიდა ყველა საჭირო პროდუქტი თუ ნივთი”.

 

რაც შეეხება ტენდერთან დაკავშირებულ გაურკვევლობას, პრესცენტრში განმარტავენ, რომ ეს იყო “გარდამავალი პერიოდი, როცა ერთ კომპანიასთან გაფორმებული კონტრაქტის ვადა ამოიწურა და მეორე კომპანიასთან გაფორმდა ხელშეკრულება. შესაბამისად, პრობლემაც ამ გარდამავალ პერიოდს უკავშირდება”.

ნეტგაზეთის მასალების სხვა გამოცემებში გადაბეჭდვის წესი
"ბათუმელები"