ნეტგაზეთი • RU

აქცია ქობულეთში – „აჭარაში რელიგიური უმცირესობა ჩაგრავს რელიგიურ უმრავლესობას“

 

დღეს, 7 ივლისს, ქობულეთში, იმ ტერიტორიაზე, სადაც მუსლიმი მრევლი რელიგიური სასწავლებლის გახსნას გეგმავდა და ამაში მოქალაქეებმა შეუშალეს ხელი, ბათუმის საქალაქო სასმართლოს მოსამართლე ხათუნა ბოლქვაძე იმყოფებოდა. აქცია ტრანსპარანტებით „აჭარაში რელიგიური უმცირესობა ჩაგრავს რელიგიურ უმრავლესობას თურქეთის დაფინანსებით“ – სწორედ მის დასახვედრად გაიმართა.

 

აქციაზე შეკრებილთა გასაგონად მოსამართლემ თქვა, რომ მხარეების მოსმენა 15 ივლისს იგეგმება. მოსამართლემ საკუთარი თვალით ნახა მანქანის საბურავებისა და ხისგან გაკეთებული ბარიერები, რომლითაც მედრესესთვის განპირობებული შენობისკენ მისასვლელი გზა არის ჩახერგილი.

 

ადგილზე იმყოფებოდა ადამინის უფლებათა სწავლებისა და მონიტორინგის ცენტრის ხელმძღვანელი თამთა მიქელაძეც. მან თქვა, რომ სარჩელში, რომელიც მათი მხარდაჭერით შეიტანეს სასამართლოში მუსლიმი მრევლის წარმომადგენლებმა, მუსლიმების დისკრიმინაციის წყაროდ დასახელებული ჰყავთ ადგილობრივი მოსახლეობა და პოლიცია. 

 

აქციის მონაწილეები მოსამართლეს უმტკიცებდნენ, რომ ეს მხოლოდ მეზობლური დავაა. მუსლიმი მრევლის წარმომადგენელმა კი თქვა, რომ ისინი სამართლებრივი გზებით გააგრძელებენ თავიანთი უფებების რეალიზაციისთვის ბრძოლას.

 

კონფლიქტი ქობულეთში გასული წლის შემოდგომაზე დაიწყო, რომლის კულმინაცია ის იყო, რომ მედრესესთვის განკუთვნილ შენობაზე მართლმადიდებელმა მრევლმა ღორის თავი მიაჭედა.

ნეტგაზეთის მასალების სხვა გამოცემებში გადაბეჭდვის წესი
netgazeti.ge