როგორც თამარ ბერუჩაშვილმა განმარტა, ქარტია მიზნად ისახავს საქართველოს ევროკავშირსა და ჩრდილო ატლანტიკურ ორგანიზაციაში ინტეგრაციის მიზნით, ლიტვის მხარდაჭერისა და თანამშრომლობის გაძლიერებას.
ქარტიის თანახმად, მხარეები თანამშრომლობენ ისეთ საკითხებზე, როგორიც არის „აღმოსავლეთ პარტნიორობის“განვითარება, ევროკავშირი -საქართველოს ასოცირების დღის წესრიგის იმპლემენტაცია, საქართველოსა და ევროკავშირს შორის უვიზო მიმოსვლის შემოღება…
ქარტიის მიხედვით, მხარეები თანხმდებიან იმაზე, რომ ერთმანეთს გაუზიარებენ გამოცდილებას. ლიტვა მზად არის საქართველოს დახმარება გაუწიოს ადმინისტრაციული და ინსტიტუციონალური შესაძლებლობების განვითარებაში.
ქართული მხარის ცნობით, ქარტიის თანახმად ლიტვა ასევე მზად არის საქართველოს დახმარება აღმოუჩინოს უსაფრთხოებისა და ევრო-ატლანტიკური ინტეგრაციის მიმართულებით და გააძლიეროს თანამშრომლობა საქართველოს ევრო-ატლანტიკური ინტეგრაციის მისაღწევად:„ამ მიზნით ლიტვის რესპუბლიკა გაზრდის საქართველოსთვის ორმხრივ პრაქტიკულ დახმარებას, განსაკუთრებით წლიური ევროპული პროგრამის შემუშავების, ნატო-საქართველოს არსებითი პაკეტის რეალიზაციასა და ნატო-საქართველოს კომისიის ფარგლებში თანამშრომლობასთან დაკავშირებით“-წერია საქართველოს საგარეო საქმეთა სამინისტროს მიერ გავრცელებულ განცხადებაში.
„საქართველოს ევროპული გზა“ – ამ სახელწოდებით ბათუმი რიგით მე-12 საერთაშორისო კონფერენციას მასპინძლობს. ევროპულ და ევროატლანტიკურ სტრუქტურებში ინტეგრაციის საკითხებში სახელმწიფო მინისტრის აპარატის მიერ ორგანიზებულ ფორუმს ევროკავშირის ქვეყნებიდან 300-მდე დელეგატი ესწრება, მათ შორის არის ბულგარეთის პრეზიდენტი.
