ნეტგაზეთი • RU

კულტურული მემკვიდრეობა, როგორც ეკონომიკური რესურსი – ამერიკელი პროფესორის საჯარო ლექცია ბათუმში

 

18 ივნისს, 14 საათზე ბათუმის შოთა რუსთაველის სახელწიფო უნივერსიტეტის #51 აუდიტორიაში ამერიკის საელჩოს ორგანიზებით გაიმართება  კოლუმბიის უნივერსიტეტის პროფესორის, დოქტორ დონოვან რიპკემას საჯარო ლექციაზე  „კულტურული მემკვიდრეობა, როგორც ეკონომიკური რესურსი.“

 

დოქტორი დონოვან რიპკემა არის კულტურული მემკვიდრეობის დაცვის სახელმძღვანელოს – „მემკვიდრეობის დაცვის ეკონომიკა“ – ავტორი; ასევე, ორგანიზაციის – „მემკვიდრეობის საერთაშორისო სტრატეგიები“ – დამფუძნებელი. იგი აღიარებული სპეციალისტია ისტორიული ნაგებობების დაცვის ეკონომიკის სფეროში.  

 

დოქტორი დ. რიპკემა კულტურული მემკვიდრეობის დაცვას განიხილავს იმ თვალსაზრისით, რომ ისტორიული ქალაქები ან უბნები შენარჩუნდეს არა როგორც მუზეუმები, არამედ, მისი აზრით, ისტორიული ნაგებობების დაცვა–შენარჩუნება ამავდროულად წარმოადგენს ეკონომიკური განვითარების მძლავრ ფაქტორს.

 

პროფესორ დ. რიპკემას 30-წლიანი საქმიანობა მოიცავს უამრავ წარმატებულ პროექტს, რომლებიც ამტკიცებს, რომ კულტურული მემკვიდრეობის სწორი მართვა ქმნის დამატებით შემოსავალს ადგილობრივი ეკონომიკისთვის (ახალი სამუშაო ადგილები, სახელფასო და საგადასახადო შემოსავლების მატება, უძრავი ქონების ფასის ზრდა და ა. შ.).

 

დოქტორი რიპკემა ფართო საგანმანათლებლო საქმიანობას ეწევა კულტურული მემკვიდრეობის ეკონომიკის სფეროში, რაც ძირითადად მოიცავს რეაბილიტაციას, თემის განვითარებას და კომერციულ რევიტალიზაციას. ის სპეციალურ კურსებსა და ვორკშოფებს ატარებს სახელმწიფო მოხელეების, რეგიონალური განვითარების, ინფრასტრუქტურის და ადგილობრივი თვითმმართველობის სამსახურების თანამშრომლებისათვის, არქიტექტორებისათვის, საბანკო თუ სამშენებლო სფეროს წარმომადგენელთათვის, ძეგლთა დაცვის სპეციალისტებისა და ურბანისტებისათვის.

 

ლექცია საჯაროა და მასზე დასწრება ყველა მსურველს შეუძლია. 

 

ნეტგაზეთის მასალების სხვა გამოცემებში გადაბეჭდვის წესი
"ბათუმელები"