Batumelebi | ნინო ლომჯარია – ”ქედაში გენდერული ნიშნით ხდებოდა კონკურსანტების დისკრიმინაცია” ნინო ლომჯარია – ”ქედაში გენდერული ნიშნით ხდებოდა კონკურსანტების დისკრიმინაცია” – Batumelebi
RU | GE  

ნინო ლომჯარია – ”ქედაში გენდერული ნიშნით ხდებოდა კონკურსანტების დისკრიმინაცია”

 

დღეს, 8 მაისს, დემოკრატიის ჩართულობის ცენტრში ორგანიზაცია “სამართლიანი არჩევნებისა და დემოკრატიის საერთაშორისო საზოგადოებამ” ახალი პროექტის „პოლიტიკური გავლენებისა და დისკრიმინაციისგან თავისუფალი საჯარო სამსახურის” პრეზენტაცია მოაწყო. პროექტს „სამართლიანი არჩევნები“, საქართველოში ნიდერლანდების სამეფოს საელჩოს ფინანსური მხარდაჭერით, ახორციელებს და მისი  მიზანია დაეხმაროს საჯარო სამსახურიდან უკანონოდ გათავისუფლებულ და დისკრიმინაციის მსხვერპლ პირებს.

„სამართლიანი არჩევნები“ ამ მხრივ დაზარალებული პირების იურიდიულ დახმარებას, კერძოდ, იურიდიული დოკუმენტაციის მომზადებას, კონსულტაციას და სასამართლოში წარმომადგენლობას უზრუნველყოფს.

  შეხვედრაზე “სამართლიანი არჩევნებისა და დემოკრატიის საერთაშორისო საზოგადოების” აღმასრულებელმა დირექტორმა ნინო ლომჯარიამ პროექტის ფარგლებში განხორციელებული მონიტორინგის შედეგებზეც ისაუბრა. მონიტორინგი ოქტომბრის თვიდან დღემდე თვითმმართველობებში მიმდინარე ატესტაცია/კონკურსების პროცესზე მიმდინარეობს.

“იყო შემთხვევები, როცა იყვნენ კვალიფიციური კადრები, თუმცა კომისიამ მიიღო გადაწყვეტილება, რომ ჩაეშალა კონკურსი და ხელახლა დაინიშნა, მაშინ როცა მიგვაჩნია, რომ ამის რესურსი არსებობდა. სხვა მხრივ შეიძლება ითქვას, რომ აჭარის მუნიციპალიტეტებში გასაუბრებების პროცესი უმეტესწილად მიმდინარეობდა ორგანიზებულად, კონკურსანტებისადმი იყო მეტ-ნაკლებად თანაბარი მიდგომა, თუმცა ჩვენს ანგარიშებში მოხვდა შემთხვევები, როცა პოლიტიკური ნიშნის შეკითხვები დაისვეს კონკურსანტთან, კერძოდ მათი წარსული პოლიტიკური საქმიანობის შესახებ” – ამბობს ნინო ლომჯარია. მისივე თქმით,  დაფიქსირდა რამდენიმე შემთხვევა, რომლებიც  გენდერულ უთანასწორობას ეხებოდა. „ქედაში გვქონდა შემთხვევა, როცა გენდერული ნიშნით ხდებოდა კონკურსანტების დისკრიმინაცია, როცა კომისიის წევრები აღნიშნავდნენ, რომ ქალი კონკურსანტები არ შეესაბამებოდნენ და ვერ გაართმევდნენ თავს იმ ვალდებულებებს, რასაც დასაკავებელი თანამდებობა ითვალისწინებდა” – ამბობს ის.

 ანგარიშის მიხედვით, გამოვლინდა მთავარი უარყოფითი ტენდენციები საბოლოო შედეგებთან დაკავშირებით.

“მართალია, ზოგიერთ პოზიციაზე კონკურსი ჩაშლილად მართებულად გამოცხადდა, მაგრამ გარკვეულ პოზიციებზე კონკურსი მიზანმიმართულად  გამოცხადდა  ჩაშლილად  მიუხედავად იმისა, რომ კომისიას არჩევის ალტერნატივა ჰქონდა;

თითქმის ყველა მუნიციპალიტეტში რიგ პოზიციებზე შერჩეული იქნა სუსტი კადრები, გარკვეულ შემთხვევაში, კომისიას ჰქონდა უკეთესის შერჩევის ალტერნატივა, გარკვეულ შემთხვევაში კი _ არა და უმჯობესი იქნებოდა სუსტი კადრების შერჩევას კონკურსი ჩაშლილად გამოეცხადებინათ.

გამარჯვებულებად უმეტესწილად ძველი კარდების გამოვლენა მოხდა, ახალი კადრები გვევლინებიან ძირითადად სპეციალისტების ან ტერიტორიული ერთეულების წარმომადგენლების ან მათი თანაშემწეების პოზიციებზე”.

ნეტგაზეთის მასალების სხვა გამოცემებში გადაბეჭდვის წესი
" ბათუმელები