ირაკლი ანთიძე ამბობს, რომ ამოიცნობს პოლიციელებს, რომლებმაც ის დააკავეს და სცემეს, თუმცა არც ერთი მათგანის სახელი და გვარი არ იცის.
მისი მოყოლით შემთხვევა დილის 5 საათზე, დიმიტრი თავდადებულისა და მემედ აბაშიძის გამზირის კვეთაში მოხდა. როცა ის ველოსიპედით გადაადგილდებოდა, ქუჩების კვეთაში მეეზოვეებს გამოელაპარაკა, რა დროსაც შეჩერდა კაფე „პრივეტთან“. ამ დროს კი მანქანა, რომელსაც ეწერა პოლიცია, შეჩერდა, გადმოვიდა მძღოლი, რომელმაც ის ველოსიპეტიდან მიწაზე „დააგდო“, ხელბორკილები „მოუჭირა“ და მანქანაში „ჯიქაობით ჩატენა“.
მისივე მონათხრობით, ის პირველად ველოსიპედის ქურდობის ბრალდებით დააკავეს, თუმცა მოგვიანებით სასამართლოში პოლიციელებისთვის წინააღმდეგობის გაწევასა და საზოგადოებრივი წესრიგის დარღვევის გამო წარადგინეს.
სასამართლომ დღეს ირაკლი ანთიძე პატიმრობიდან გაათავისუფლა. ადმინისტრაციული საქმის განხილვა ბათუმის საქალაქო სასამართლოში ხვალ მოწმეების დაკითხვით გაგრძელდება.
ხვალ სასამართლო იმ პოლიციელებს დაკითხავს, ვინც ირაკლი ანთიძე დააპატიმრა. ირაკლი ანთიძე მოითხოვს იმ მოწმეების, ანუ მეეზოვეების დაცვას, რომლებმაც დაინახეს, თუ რა ვითარებაში დააკავეს პოლიციელებმა ის.
შს სამინისტრო პრესსამსახურის თანამშრომელი, სალომე წერეთელმა ფაქტთან დაკავშრებით „ბათუმელებთან“ განმარტავს: „შემოწმების მიზნით შეაჩერეს ირაკლი ანთიძე. მან გაუწია წინააღმდეგობა სამართალდამცავებს, რის გამოც ადმინისტრაციული კოდექსის 166-ე და 173-ე მუხლებით დააკავეს“.
