"ბათუმელების“ არქივიდან

„კმარა“ ახალი დაუმორჩილებლობით იმუქრება

25.02.2004 • 4625
„კმარა“ ახალი დაუმორჩილებლობით იმუქრება

„პრეზიდენტს ვთხოვთ, ყველა დანაშაულისათვის პასუხი მოსთხოვოს ადგილობრივ ხელისუფლებას. ვთხოვთ ყველას, ვინც უფლებამოსილია, მიმდინარე მოვლენებზე მოახდინონ რეაგირება“, – მოითხოვს „კმარას“  ბათუმელი აქტივისტები და წინააღმდეგ შემთხვევაში, ხალხის ტოტალური დაუმორჩილებლობის მოწოდებით იმუქრებიან.

„გამოდის, რომ ჩვენ ყველაფერს ტყუილად ვეწირებით, პრეზიდენტმაც უნდა მიიღოს რაღაც ზომები“, – ასე ამბობენ ქალაქის ერთ-ერთ გარეუბანში დამალული იმედგაცრუებული „კმარას“ აქტივისტები. 20 თებერვალს „აღორძინების“ მხარდამჭერები მათ ყველაზე სასტიკად გაუსწორდნენ.

მათ მიმართ გამოხატული აგრესიის მოკლე ქრონიკა ასეთია:

ოპოზიციის მიტინგზე „კმარას“ აქტივისტებს ადვილად არჩევენ ზურგზე მოხვეული „კმარასა“ და ხუთჯვრიანი დროშების წყალობით და მათ სასტიკად სცემენ. ნაცემი „კმარელები“ თავს „დემოკრატიული აჭარას“ ოფისს აფარებენ. აქტივისტების თქმით: „დემოკრატიულ აჭარაში“ სპეცდანიშნულების რაზმი გამოჩნდა იგივე პიროვნებებით, რომლებიც გვარბევდნენ, შემდეგ შემოვიდნენ ნიღბებით, ვითომ გაგვათავისუფლეს და სამშვიდობოზე გაგვიყვანეს. 3-4 პიროვნება ვიცანით და ჯემალ გოგიტიძეს ვუთხარით, აი ეს პიროვნებებია, რომლებიც გვარბევდნენ-თქო. მან ამაზე არავითარი რეაგირება არ გააკეთა, ინტრიგნები ხართო-გვითხრა“.

„კმარელები“ ამ ოფისიდან მას შემდეგ მიდიან, როცა იქ სპეცოპერაცია იწყება. მათი განცხადებით სახლებში უსაფრთხოდ წაყვანის გარანტია მათ ჯემალ გოგიტიძემ მისცა, თუმცა, გარეთ გამოსულებს უცხადებენ, რომ სასწრაფოდ თავადვე დატოვონ ტერიტორია, თუ უნდათ, რომ გადარჩნენ. „კმარას“ აქტივისტები ქალაქის ცენტრს ტოვებენ.

პარალელურად, სასტიკად არბევენ „კმარას“ ოფისს და თავს ესხმიან „რუსთავი 2“-ის გადამღებ ჯგუფს, რომლებმაც ეს ფაქტი ვიდეოკამერაზე აღბეჭდეს, ართმევენ ვიდეო-კასეტებს.

„სიხარულიძე მინდიას დარტყმის შედეგად წყალი აქვს მუხლში ჩამდგარი, ვერ დადის. ჯანო რიჟვაძესა და თამუნას თავი აქვთ გატეხილი. ვინც სერიოზულადაა დაშავებული ქალაქი უკვე დატოვა, რადგან აქ ეშინიათ. თავს რომ ვაფარებდით „დემოკრატიული აჭარას“ ოფისს, დაწვით დაგვემუქრნენ, ქვები დაგვიშინეს, ამიტომაც მათი აქ საავადმყოფოში გაჩერება არ შეიძლებოდა“, – ამბობენ თბილისზე იმედგაცრუებული „კმარას“ ნაცემი აქტივისტები და საყოველთაო დაუმორჩილებლობით იმუქრებიან: „ის პიროვნებები, რომლებიც თავს დაგვესხა, უნდა დაისაჯონ. თუ  არ იქნება სათანადო ზომები მიღებული, დასაკარგი არაფერი გვაქვს და ყველას მოვუწოდებთ საყოველთაო დაუმორჩილებლობისაკენ“.

მეორე დღეს ჩოლოქში, თბილისიდან ბათუმში მომავალ „კმარას“ აქტივისტებს სამარშუტო ტაქსში აკავებენ. „ჩანთაში ნახეს იგივე შინაარსის პროკლამაციები, რასაც მანამდე ვავრცელებდით. უხეშად, სულ ცემა-ცემით ჩამოგვყარეს მანქანიდან. 25-მა ნიღბიანმა კაცმა შეგვაგდო ოთახში და ბიჭებს უმოწყალოდ დაგვიწყეს ცემა. გვემუქრებოდნენ, ჩოლოქს იქეთ ვერ გახვალთო, არ გვაძლევდნენ დარეკვის საშუალებას. მერე ვინც გვირტყამდა, ერთ-ერთი მათგანი მოვიდა და ჩემი მანქანით გაგაცილებთ ბათუმამდეო. ბუნებრივია, ვერ ვენდობოდით. დაგვყარეს შუა ქუჩაში“, – ყვებიან სოფიკო ჟღენტი და სოფიკო პატარაია. სასტიკად ნაცემი და სიცივისაგან გათოშილი „კმარელები“ სამი საათის განმავლობაში იდგნენ ჩოლოქს ხიდის გაღმა მხარეს. „კმარას“ ოთხმა წევრმა ბათუმში შემოსვლა არასამთავრობო ორგანიზაციათა დახმარებით შეძლო.

აჭარის შინაგან საქმეთა მინისტრი ჯემალ გოგიტიძე ამ ფაქტთან დაკავშირებით ამბობს, რომ მან არ იცის რას ამბობენ „კმარას“ აქტივისტები და ვინ დააკავა ისინი ჩოლოქზე. მინისტრის განცხადებით, ისინი პროვოკაციაზე მიდიან.

„მივმართავ საქართველოს პრეზიდენტს, რომ ყოველივე ამაზე მოახდინოს რეაგირება და მოსთხოვოს პასუხი აჭარის ხელისუფლებას. ჩვენ მოვითხოვთ, ასლან აბაშიძემ გააკეთოს კომენტარი ამასთან დაკავშირებით. დამნაშავემ პასუხი უნდა აგოს“, – ასეთი კატეგორიულია ჩოლოქზე მომხდარი ინციდენტის შემდეგ „კმარას” აქტივისტი სოფიკო ჟღენტი.

იმ დღეებში „კმარას” აქტივისტები მარტოდ დარჩენაზე საუბრობდნენ. თუმცა, უკვე ვრცელდება ინფორმაცია იმის შესახებ, რომ მათ არც მარტო და არც დაფინანსების გარეშე არ დატოვებენ. უფრო მეტიც, საუბრობენ იმაზეც, რომ ადგილობრივ „კმარელებს“ მალე აქტივისტები სხვადასხვა რეგიონიდან და დედაქალაქიდანაც შეუერთდებიან.

 

გადაბეჭდვის წესი


ასევე: