საქართველოს სავაჭრო-სამრეწველო პალატის თავმჯდომარედ პალატის პრეზიდიუმის რიგგარეშე სხდომაზე, სამაუწყებლო კომპანია „რუსთავი 2“-ის დამფუძნებელი ეროსი კიწმარიშვილი აირჩიეს.
კიწმარიშვილის კანდიდატურა აღნიშნულ თანამდებობაზე ერთადერთი იყო, ვინაიდან ორშაბათს ამ პოსტზე საკუთარი კანდიდატურა პალატის ვიცე-პრეზიდენტმა ირაკლი გეგეშიძემ მოხსნა.
ეროსი კიწმარიშვილი პირადად წარადგინა პრემიერ-მინისტრმა ზურაბ ჟვანიამ.
მისი თქმით, კიწმარიშვილის წარდგენის საქმეში მთავარი როლი ითამაშა იმ ფაქტმა, რომ იგი არის ენერგიული, თანამედროვე პირობებს მორგებული ბიზნესმენი, რომელიც ყოველთვის სუფთა და გამჭვირვალე ბიზნესს აწარმოებდა
ზურაბ ჟვანიამ აღნიშნა, რომ ეროსი კიწმარიშვილის როლი „ვარდების რევოლუციაში“ მნიშვნელოვანია, თუმცა იქვე დასძინა, რომ იგი ის ადამიანია, ვინც შეძლებს სავაჭრო სამრეწველო პალატის საჭირო სიმაღლეზე დაყენებას და მთავარი პრიორიტეტი ბიზნესის განვითარების ხელშეწყობა იქნება.
როგორც სხდომაზე გამოსვლისას ეროსი კიწმარიშვილმა განაცხადა, მას, მეგობრებთან ერთად, ალბათ მნიშვნელოვანი წვლილი მიუძღვის „ვარდების რევოლუციაში“ და მიაჩნია, რომ ქვეყნისა და ხალხის მომავალი ბედი პირადად მისი და მისი მეგობრების სინდისზეც იქნება.
წარსულში საქართველოს სამრეწველო-სავაჭრო პალატას წლების განმავლობაში ექსპრეზიდენტ ედუარდ შევარდნაძის მძახალი გურამ ახვლედიანი ხელმძღვანელობდა.
