Batumelebi | საქართველოს პრეზიდენტს, მის აღმატებულებას ბატონ მიხეილ სააკაშვილს საქართველოს პრეზიდენტს, მის აღმატებულებას ბატონ მიხეილ სააკაშვილს – Batumelebi
ნეტგაზეთი • RU

საქართველოს პრეზიდენტს, მის აღმატებულებას ბატონ მიხეილ სააკაშვილს

ბატონო პრეზიდენტო! აჭარის საღად მოაზროვნე ადამიანები, მოგესალმებათ, გისურვებთ ჯანმრთელობას და წარმატებებს. თქვენს მიერ 2004 წლის 25 იანვარს ინაუგურაციაზე, ღვთისა და კონსტიტუციის წინაშე დადებულმა ფიცმა – „ჩემს პრეზიდენტობას მე ვუძღვნი საქართველოს გაერთიანებას და გაძლიერებასო“, დიდი სიხარული მოგვგვარა და რწმენა შეგვმატა, მაგრამ გული გვატკინა იმან, რომ აჭარის კრიმინალური ხელისუფლება ამ მეტად მნიშვნელოვანი ამოცანის შესრულებაში, დახმარების ნაცვლად ხელს გიშლით და მედგარ წინააღმდეგობას გიწევთ, აშკარად ილაშქრებს ქვეყნის ახალი ხელმძღვანელობის მიერ დაწყებული სასიკეთო საქმეების განხორციელების წინააღმდეგ.

აჭარის მეთაურმა სატელევიზიო გადაცემაში განაცხადა, თუ საქართველოს ხელისუფლება ჭკუით არ იქნება, აფხაზეთი და ოსეთი მონაგონი გახდება, ჩვენ ამისთვის ყოველმხვრივ მზადა ვართო. ამისი ნათელი დადასტურებაა ბათუმის ცაზე ვერტმფრენების გამუდმებული გრუხუნი, ქუჩებში მათ მიერ თითქმის ყოველდღიურად მოწყობილი მიტინგები და შეიარაღებული ფორმირებების ავტოჯირითი შეძახილებით „ბაბუ“, „ბაბუ“, „ბაბუ!“, რაც მოსახლეობის შეშფოთებას იწვევს.

სწორედ ასეთი მდგომარეობითაა გამოწვეული პროფესიული კავშირების აჭარის რეგიონალური გაერთიანების განცხადება, გაზეთების – „აჭარას“ და „თქვენი გაზეთი“-ს ფურცლებზე (გაზეთი „აჭარა“, 30 იანვარი, #18, და „თქვენი გაზეთი“, #1 (12), იანვარი, 2004 წელი), რომლითაც მოუწოდებდა ხელისუფლებას და ყველა პოლიტიკურ ძალას „თავი შეიკავონ რადიკალური ქმედებებისაგან, რასაც შეიძლება მოყვეს დესტაბილიზაცია და სისხლის ღვრა“.

აჭარის ხელისუფლებამ უკვე შეიარაღა მისი ერთგული ადამიანები, რუსეთიდანაც შემოიყვანა გაწვრთნილი მებრძოლები თავისი რეჟიმის დასაცავად. გრძელდება ბანდფორმირებების ჩამოყალიბება, შეიარაღება და წვრთნა შინაგანი ჯარის ბათუმის ბატალიონის ბაზაზე. მოქალაქეებზე იარაღის გაცემის ფაქტი დაადასტურა შს მინისტრმა ჯ. გოგიტიძემ აჭარის ტელევიზიით – „აჭარის მოსახლეობაში ყოველთვის იყო დიდძალი იარაღი, ამჟამად დაურიგდათ იარაღი სახალხო რაზმელებს, რათა დაიცვან აჭარის კანონიერი ხელისუფლება“.

აჭარაში მდგომარეობა თანდათან იძაბება. შევიწროვებული და დაჩაგრული მოსახლეობა შიშისა და მუქარის ქვეშ იმყოფება. თქვენი სამადლობელი განცხადება ა. აბაშიძის მიმართ ელ. ენერგიის რუსეთიდან გამოყოფაზე, საზოგადოებამ აჭარის ხელისუფლების  მხარდაჭერად და მის გვერდით დგომად აღიქვა. ამას აჭარის ხელისუფლება თავისი ბინძური ზრახვებისთვის იყენებს და უკეთებს არასწორ ინტერპრეტაციას. თუ საქართველოს პრეზიდენტი ა. აბაშიძეს მართლაც მხარს დაუჭერს, მაშინ აჭარის საღად მოაზროვნე ადამიანები დაკარგავენ პრეზიდენტის ნდობასა და იმედს. გამოდის, რომ აჭარა ბოლომდე განწირული ყოფილა.

ბატონო პრეზიდენტო! თქვენი აქტიური ჩარევის გარეშე არაფერი გვეშველება. უმორჩილესად გთხოვთ, პარლამენტმა დააჩქაროს 10-12 წლის განმავლობაში აჭარის კონსტიტუციაში მომხდარი ანტიქართული ცვლილებების გაუქმება და მიიღოს კანონი ცენტრისა და რეგიონის უფლებათა გამიჯვნის შესახებ, გამჭვირვალე გახდეს ფინანსური დავები და გამოქვეყნდეს პრესაში ურთიერთდავალიანების  სრული ნუსხა, დაე ხალხმა თავად განსაჯოს მტყუან-მართალი. ამით ფარდა აეხდება აბაშიძის კრიმინალურ-ფეოდალურ მმართველობას და მოსალოდნელი უბედურებისაგან დაზღვეულნი ვიქნებით.

 

ნეტგაზეთის მასალების სხვა გამოცემებში გადაბეჭდვის წესი
ს/გ დემოკრატიისა და სამართლიანობისათვის - „გაერთიანებული ოპოზიცია - ჩვენი აჭარა“