Batumelebi | მომავალი მინისტრები ჟვანიასთან პროგრამებს ათანხმებენ მომავალი მინისტრები ჟვანიასთან პროგრამებს ათანხმებენ – Batumelebi
RU | GE  

მომავალი მინისტრები ჟვანიასთან პროგრამებს ათანხმებენ

მინისტრობის კანდიდატები სახელმწიფო მინისტრ ზურაბ ჟვანიასთან კონსულტაციებს გამართავენ საკუთარი სამოქმედო გეგმის შესათანხმებლად.

მომავალი პრემიერი ზურაბ ჟვანია კი მინისტრთა კაბინეტის სამოქმედო გეგმის საბოლოო ვარიანტს  ორშაბათსვე წარუდგენს სააკაშვილს.

როგორც კონსულტაციების დაწყების წინ მომავალმა სახელმწიფო მინისტრმა თამარ ბერუჩაშვილმა  განაცხადა, ახალი მთავრობის მომავალ სტრატეგიულ ამოცანას, როგორც საგარეო, ასევე საშინაო საქმეებში, ევროპული ინტეგრაცია წარმოადგენს.

მისი თქმით, აუცილებელია მოხდეს ისეთი უმნიშვნელოვანესი ამოცანების განსაზღვრა, რომლებიც მოიცავს პარტნიორებთან თანამშრომლობის ხელშეკრულების ეფექტურ იმპლემენტაციას, ქართული კანონმდებლობის ევროპულ კანონმდებლობასთან ჰარმონიზაციას,  ევროპული სტანდარტების დანერგვის ხელშეწყობას და ევროსტრუქტურებში საქართველოს თანდათანობით ინტეგრაციას.

იუსტიციის მომავალი მინისტრის გიორგი პაპუაშვილის  სამოქმედო პროგრამის ძირითად არსს  სამართლებრივი რეფორმების გაგრძელება წარმოადგენს.

მისი თქმით, ყველაზე უფრო  მნიშვნელოვანია პენიტენციალური სისტემის რეფორმა, სასამართლო რეფორმის გაგრძელება და საქართველოს კანონმდებლობის ევროპულთან ჰარმონიზაცია.

მომავალი ჯანდაცვის მინისტრის გიგი წერეთლის თქმით, მის მთავარ ამოცანას წარმოადგენს ჯანდაცვის დარგში საგადასახადო შემოსავლების გაზრდის კვალდაკვალ, იმ პროგრამების მოცულობის გაფართოება, რომლებიც მოსახლეობის გადაუდებელი სამედიცინო და სხვა აუცილებელი დახმარების დაფინანსებას ითვალისწინებს.

ასევე, მთავარ საკითხს წარმოადგენს საპენსიო დავალიანების დაფარვის დაჩქარება და უახლოეს ხანებში არსებული მინიმალური პენსიის ზრდის პროცესის დაწყება.

კულტურის, სპორტისა და ძეგლთა დაცვის მომავალი მინისტრობის კანდიდატი გიორგი გაბაშვილი ძირითად ყურადღებას კულტურული მემკვიდრეობის დაცვის საკითხებზე ამახვილებს.

მისი თქმით, სამინისტროს უმთავრესი ფუნქცია კულტურულ მემკვიდრეობაზე ზრუნვა მისი შენარჩუნება და პოპულარიზაცია იქნება.

ამ შემთხვევაში მოიაზრება პრობლემათა მთელი კომპლექსი, მათ შორის ძეგლთა დაცვის, ისტორიული დოკუმენტების და ხელოვნების ნიმუშების დაცვის თვალსაზრისით, ამბობს გაბაშვილი.

შაბათს, განათლებისა და მეცნიერების მინისტრად წარდგენილ იქნა კახა ლომაია, გარემოს დაცვისა და ბუნებრივი რესურსების მინისტრად თამარ ლებანიძე, ენერგეტიკის მინისტრად ნიკოლოზ გილაური, თავდაცვის მინისტრად გელა ბეჟუაშვილი, ინფრასტრუქტურის და განვითარების მინისტრად თამარ სულუხაია.

იუსტიციის მინისტრად წარადგინეს გიორგი პაპუაშვილი, კულტურის, ძეგლთა დაცვისა და სპორტის მინისტრად გიორგი გაბაშვილი, უშიშროების მინისტრად ზურაბ ადეიშვილი, სოფლის მეურნეობის მინისტრად დავით შერვაშიძე, შრომის, ჯანმრთელობის და სოციალური დაცვის მინისტრად გიორგი (გიგი) წერეთელი.

ამასთან, ეკონომიკის მინისტრი იქნება ირაკლი რეხვიაშვილი, ფინანსთა მინისტრი ზურაბ ნოღაიდელი, შინაგან საქმეთა მინისტრი გიორგი ბარამიძე,  ლტოლვილთა და განსახლების  მინისტრი ეთერ ასტემიროვა და  საგარეო საქმეთა მინისტრი თედო ჯაფარიძე.

სახელმწიფო მინისტრების პოსტებს დაიკავებენ – ევროინტეგრაციული პოლიტიკის კოორდინაციის საკითხებში თამარ ბერუჩაშვილი, აფხაზეთისა და ცხინვალის კონფლიქტების მოგვარების საკითხებში გიორგი ხაინდრავა, მცირე და საშუალო ბიზნესის საკითხებში ჯამბულ ბაკურაძე,  ეროვნული თანხმობის საკითხებში გურამ აბსანძე.

მინისტრთა კაბინეტის შემადგენლობა დასამტკიცებლად სამთავრობო პროგრამასთან ერთად კვირას წარუდგენენ პარლამენტს.

პარლამენტის მიერ გასულ კვირას მიღებული გადაწყვეტილების სამინისტროების რიცხვი 18-დან 15-მდე შემცირდა. ამასთან უმრავლესობა დეპარტამენტებისა სამინისტროებს შეუერთდა.

ნეტგაზეთის მასალების სხვა გამოცემებში გადაბეჭდვის წესი
„გაზეთი ბათუმელები“