სამინისტროს ინფორმაციით, 2015 წლის 6 მარტს სალიბაურის N2 საჯარო სკოლაში, აჭარის ჯანმრთელობისა და სოციალური დაცვის სამინისტროსა და აჭარის განათლების, კულტურისა და სპორტის სამინისტროს შორის ხელი მოეწერება ურთიერთთანამშრომლობის მემორანდუმს, რომელიც ითვალისწინებს აჭარის საზოგადოებრივი ჯანდაცვის ცენტრის ერთ-ერთი ღონისძიების, „ავადობის აქტიური გამოვლენა სამიზნე ჯგუფში“, განხორციელებაში ხელშეწყობას.
მემორანდუმის ფარგლებში ზოგადასაგანმანათლებლო დაწესებულებების პირველი-მერვე კლასის მოსწავლეთა სამედიცინო – პროფილაქტიკურ შემოწმებას აჭარაში „სს საზღვაო ჰოსპიტალი“ განახორციელებს. მოსწავლეებს ჩაუტარდებათ პედიატრის, ოკულისტის, ენდოკრინოლოგის, ორთოპედის კონსულტაციები.
აჭარის ავტონომიური რესპუბლიკის განათლების, კულტურისა და სპორტის სამინისტრო იღებს ვალდებულებას მისი ტერიტორიული ორგანოების (რესურსცენტრები) მეშვეობით ხელი შეუწყოს ღონისძიების შეუფერხებელ მიმდინარეობასა და ორგანიზება გაუწიოს სკოლის მოსწავლეთა მობილიზაციას.
