დღეს, 27 ოქტომბერს, საკონსტიტუციო სასამართლოს სხდომათა დარბაზში, სადაც ოპოზიციური პარტიების აკრძალვის საქმეს განიხილავდნენ, „ერთიანი ნაციონალური მოძრაობის“ წარმომადგენელი ანა წითლიძე წარდგა სიტყვით.
ოპოზიციური პარტიების წინააღმდეგ „ქართული ოცნების“ სარჩელში მოყვანილ რამდენიმე ბრალდებასთან ერთად, ანა წითლიძემ განიხილა ის მაგალითებიც, რომლებზეც „ოცნება“ სარჩელში უთითებს, როგორც ანალოგებზე სხვა ქვეყნებში. ერთ-ერთი ასეთი საქმეა „ჰერი ბატასუნა და ბატასუნა ესპანეთის წინააღმდეგ“.
2003 წელს ესპანეთის უზენაესმა სასამართლომ ბასკურ პარტიებს, „ჰერი ბატასუნასა“ და „ბატასუნას“, აუკრძალა საქმიანობა. ესპანურმა მართლმსაჯულებამ დაადგინა, რომ ეს პარტიები წარმოადგენდნენ ტერორისტული ორგანიზაცია ETA-ს პოლიტიკურ ფრთას და იზიარებდნენ მის იდეოლოგიას, კონტროლდებოდნენ ამ ტერორისტული ჯგუფის მიერ, რასაც იყენებდნენ დემოკრატიული წესრიგის შესასუსტებლად.
პარტიებმა ესპანეთის სასამართლოების გადაწყვეტილება სტრასბურგში გაასაჩივრეს და ამტკიცებდნენ, რომ დაირღვა მათი გაერთიანების თავისუფლება. კერძოდ, ადამიანის უფლებათა ევროპული კონვენციის მე-11 მუხლი. 2009 წლის 30 ივნისს ადამიანის უფლებათა ევროპულმა სასამართლომ დაადგინა, რომ კონვენციის მე-11 მუხლი არ დარღვეულა.
ანა წითლიძემ სხდომაზე განმარტა, რატომ არ გამოდგება „ჰერი ბატასუნასა“ და „ბატასუნას“ მაგალითი საქართველოში პარტიების გასაუქმებლად.
„ყველაზე ხშირად მოჰყავთ ესპანეთში „ბატასუნას“ მაგალითი.
მოდით, ვნახოთ, რა იყო ესპანეთში ამ პარტიის აკრძალვის საფუძველი. ეს იყო სეპარატისტული პარტია და ევროპის ადამიანის უფლებათა სასამართლომ ეს აკრძალვა ძალაში დატოვა შემდეგი არგუმენტაციით – პარტია პირდაპირ კავშირში იყო ტერორისტულ ორგანიზაციასთან, ETA-სთან, ღიად უარყოფდა ძალადობის დაგმობას, სისტემატურად ამართლებდა და მონაწილეობდა ტერორიზმში. გაცხადებული მიზნები და ამოცანები ჰქონდა და ადამიანის მკვლელობებსა და ტერორისტულ აქტებში მონაწილეობდა“ – განაცხადა ანა წითლიძემ და მოსამართლეებს მიმართა:
„რა შუაშია, პატივცემულო მოსამართლეებო, ამ პარტიების აკრძალვა იმ ბრალდებებთან, რასაც მოსარჩელე მხარე ოპოზიციური პარტიების აკრძალვის არგუმენტად იყენებს, რაც მოსარჩელეს აქვს ბრალდების სახით ამ კონსტიტუციურ სარჩელში.
რას ამბობს მოსარჩელე სარჩელში? – მოსარჩელე აცხადებს, რომ ძალადობის მხარდაჭერად და წახალისებად ითვლება, არა მხოლოდ პირდაპირი მოწოდება, არამედ ისეთი შემთხვევაც, როდესაც პოლიტიკური პარტია ძალადობის ჩადენის შესახებ სხვა ძალის მოწოდებას პირდაპირ, ნათლად და მყისიერად, საჯარო განცხადებით არ ემიჯნებაო, ეს არის სრული სამართლებრივი აბსურდი“.
ანა წითლიძემ აღნიშნა, რომ „ოცნება“ ცდილობს, შექმნას ხელოვნური და სახიფათო პრეცედენტი, თითქოს რომელიმე ოპოზიციური პარტია ვალდებულია, მმართველი ძალის მიერ დაწესებულ დღის წესრიგს აჰყვეს და პასუხი აგოს სხვის განცხადებებზე.
„თუ ძალადობასა და სისტემურ რეპრესიებზეა საუბარი, ძალადობის მონოპოლია ოპოზიციას კი არა, ამ ქვეყანაში აქვს სახელისუფლებო მანქანას, რომელიც საკუთარ მოქალაქეებს ქუჩაში არბევს და ასისხლიანებს“ – განაცხადა მან.
ანა წითლიძემ ასევე გაიხსენა „ოცნების“ პრემიერის, ირაკლი კობახიძის განცხადება – „ნული თანაგრძნობა“ აქციის მონაწილეების ერთ-ერთი დარბევის შემდეგ.
„პოლიტიკური უმოქმედობისთვის ოპოზიციისთვის ბრალის წაყენება არის ავტორიტარული მეთოდი, რომელიც მიზნად ისახავს თავისუფალი აზრის ჩახშობას.
მოდი, მაინც გავყვეთ მოსარჩელის ლოგიკას და ერთ-ერთ მთავარ ბრალდებას, რომ დუმილი არის დანაშაული და ვკითხოთ მოსარჩელის მხარეს, როდის გაემიჯნა გახარიას გავრილოვის ღამეს? – უფრო მეტიც, არათუ არ გამიჯვნიან, პრემიერ-მინისტრად დააწინაურეს.
როდის გაემიჯნნენ ირაკლი ღარიბაშვილს, როდესაც ის ძალადობაზე აკეთებდა განცხადებებს და ადამიანებს ასისხლიანებდა ქუჩაში? – არც ერთხელ. უფრო მეტიც ან დუმილის რეჟიმში იყვნენ, ან გამოდიოდნენ და ღიად, საჯაროდ მხარს უჭერდნენ ძალადობას“ – განაცხადა ანა წითლიძემ.
პარტიების აკრძალვის სარჩელის განხილვა საკონსტიტუციო სასამართლოში მეხუთე დღეა მიმდინარეობს. სხდომა ხვალ, 28 ოქტომბერს, განახლდება.
„ქართული ოცნების“ 88 დეპუტატი სარჩელით ითხოვს პოლიტიკური პარტიების: „ერთიანობა – ნაციონალური მოძრაობა“, „კოალიცია ცვლილებისთვის გვარამია მელია გირჩი დროა“, „ძლიერი საქართველო – ლელო, ხალხისთვის, თავისუფლებისთვის!“, „ფედერალისტური პარტია“, „გახარია საქართველოსთვის“ საქმიანობის არაკონსტიტუციურად ცნობას და მათ აკრძალვას.
_______________
ფოტოზე: ანა წითლიძე საკონსტიტუციო სასამართლოში
