უკრაინის პრეზიდენტის აპარატის უფროსი მრჩეველმა მიხაილო პოდოლიაკი ტვიტერზე წერს, რომ უკრაინა პირდაპირ კავშირში არ არის რუსეთში, ბელგოროდის ოლქში 22 მაისს განვითარებულ მოვლენებთან.
„ერთადერთი მამოძრავებელი პოლიტიკური ძალა მარწუხებში მოქცეულ ტოტალიტარულ ქვეყანაში ყოველთვის გარდაუვალად ხდება პარტიზანული მოძრაობა იარაღით ხელში.
უკრაინა ინტერესით ადევნებს თვალს რუსეთში, ბელგოროდში განვითარებულ მოვლენებს და სწავლობს სიტუაციას, ამავე დროს ამ მოვლენებთან არ არის პირდაპირ დაკავშირებული. როგორც ცნობილია, ტანკები იყიდება რუსეთის ნებისმიერ სამხედრო განყოფილებაში, ხოლო პარტიზანული რაზმები რუსეთის მოქალაქეებისგან შედგება“ – წერს პოდოლიაკი.
- რა ხდება?
22 მაისის დილიდან, მედია და ტელეგრამ-არხები აქტიურად წერენ უკრაინის მოსაზღვრე ბელგოროდის ოლქში მიმდინარე მოვლენებზე.
ვრცელდება ცნობები, რომ უკრაინის მხარეს მებრძოლი რუსების ლეგიონმა რუსეთის ტერიტორიაზე რამდენიმე დასახლებული პუნქტი დაიკავა, ხოლო იქამდე – რუსული სასაზღვრო პუნქტი გაანადგურა.
უკრაინული ტელეგრამ-არხების ცნობით, რუსეთის ტერიტორიაზე, ბელგოროდის ოლქის დაბა გრაივორონში არტილერიული ცეცხლით განადგურებულია სასაზღვრო პუნქტი, მოგვიანებით კი გავრცელდა ვიდეო, სადაც პუნქტზე უკრაინული ტანკიც გადაადგილდება.
რუსული მხარე აქედან მხოლოდ გრაივორონის რაიონის რამდენიმე სოფლის დაბომბვას ადასტურებს, თუმცა, ამ სოფლებს შორისაა კაზინკაც, რომელიც უშუალოდ უკრაინის საზღვართანაა და რომელშიც მდებარეობს ხსენებული პუნქტი.
ბელგოროდის ოლქის გუბერნატორი გლადკოვი იმასაც ამბობს, რომ რაიონში უკრაინული სადაზვერვო-დივერსიული ჯგუფია შესული, რომელსაც რუსული ძალები ებრძვიან. რუსული ტელეგრამ-არხების ინფორმაციით, ჯგუფთან საბრძოლველად გააგზავნეს ვერტმფრენებიც.
უკრაინული მხარე კი ამბობს, რომ ბელგოროდში არა უკრაინის შეიარაღებული ძალების ნაწილები, არამედ ლეგიონი „რუსეთის თავისუფლება“ მოქმედებს [ლეგიონში რუსები არიან გაწევრიანებული და იბრძვის უკრაინის მხარეს]. პრეზიდენტ ზელენსკის ადმინისტრაციაშიც თქვეს, რომ მიმდინარე მოვლენებთან უკრაინას უშუალო შეხება არ აქვს.
