რუსეთის ბრალდებას იმის შესახებ, რომ უკრაინა დრონებით დაესხა თავს კრემლს, ოფიციალური კიევი უარყოფს. ზელენსკის პრესსამსახურის განცხადების შემდეგ კრემლის ბრალდებას ტვიტერზე გამოეხმაურა მიხაილო პოდოლიაკი, უკრაინის პრეზიდენტის მრჩეველი.
„რაც შეეხება დრონებს კრემლის თავზე. ეს ყველაფერი პროგნოზირებადია… რუსეთი აშკარად ამზადებს ფართომასშტაბიან ტერაქტს. ამიტომ იგი პირველად აკავებს ყირიმში მსხვილ, სავარაუდო დივერსიულ ჯგუფს, შემდეგ კი „კრემლის თავზე დრონების“ დემონსტრირებას ახდენს.
უპირველეს ყოვლისა, უკრაინა აწარმოებს ექსკლუზიურად თავდაცვით ომს და არ ესხმის ობიექტებს რუსეთის ფედერაციის ტერიტორიაზე. რისთვის? ეს არ გადაწყვეტდა რაიმე სამხედრო საკითხს. მაგრამ ეს აძლევს რუსეთის ფედერაციას საფუძველს, გაამართლოს თავისი თავდასხმები მშვიდობიან მოსახლეობაზე…
მეორეც, ჩვენ ინტერესით ვაკვირდებით უბედური შემთხვევებისა და ინციდენტების მზარდ რაოდენობას, რომლებიც ხდება რუსეთის ფედერაციის სხვადასხვა კუთხეში. ენერგეტიკულ ობიექტებზე ან კრემლის ტერიტორიაზე დაუდგენელი უპილოტო საფრენი აპარატების გაჩენა მხოლოდ ადგილობრივი წინააღმდეგობის ძალების პარტიზანულ ქმედებებზე შეიძლება მიუთითებდეს. მოგეხსენებათ, დრონების შეძენა შესაძლებელია ნებისმიერ სამხედრო მაღაზიაში…
პუტინის კლანის მიერ ქვეყანაში ძალაუფლების კონტროლის დაკარგვა აშკარაა. მაგრამ, მეორე მხრივ, რუსეთს არაერთხელ უსაუბრია ჰაერზე ტოტალურ კონტროლზე. ერთი სიტყვით, რუსეთის ფედერაციაში რაღაც ხდება, ოღონდ კრემლის თავზე უკრაინის დრონების გარეშე“ – წერს პოდოლიაკი ტვიტერზე.
- რა მოხდა?
„კიევმა ღამით კრემლზე დრონებით შეტევა სცადა, მაგრამ თავდასხმა წარმატებით იქნა მოგერიებული“ – განაცხადა დღეს, 3 მაისს, რუსეთის პრეზიდენტის, ვლადიმერ პუტინის პრესსამსახურმა.
პრესსამსახურის ცნობით, ორი უპილოტო საფრენი აპარატი კრემლისკენ, პუტინის რეზიდენციისკენ იყო მიმართული.
„სამხედრო და სპეცსამსახურების მიერ სარადარო სისტემების დროული ქმედებების შედეგად, მოწყობილობები მწყობრიდან გამოვიდა“, – ციტირებს პრესსამსახურს რუსული მედია.
კრემლი აცხადებს, რომ უკრაინის შეტევის შედეგად პუტინი არ დაშავებულა, მისი სამუშაო გრაფიკი არ შეცვლილა და პუტინი ჩვეულ რეჟიმში მუშაობს.
„რუსეთი იტოვებს უფლებას, უპასუხოს კრემლზე თავდასხმის მცდელობას, სადაც და როცა საჭიროდ მიიჩნევს,“ – წერს რუსული სააგენტო „ტასი“ პრესსამსახურზე დაყრდნობით.
