G 20-ის ლიდერებმა არ უნდა დაუშვან პუტინი საკუთარ შეხვედრებზე. ვიდრე უკრაინაში ომია, მოლაპარაკებებზე რუსეთის პრეზიდენტის ადგილი არ არის – აცხადებს ბრიტანეთის პრემიერობის კანდიდატი რიში სუნაკი და მოკავშირეებს მოუწოდებს, არ აწარმოონ მოლაპარაკებები რუსეთის პრეზიდენტთან „დიდი ოცეულის“ სამიტის ფარგლებში.
„ჩვენს პარტნიორებსა და მოკავშირეებს აქვთ კოლექტიური პასუხისმგებლობა, შეაფასონ პუტინის ამაზრზენი საქციელი. ის პასუხისმგებელია იმაზე, რომ ბავშვებს საკუთარ საწოლებში კლავენ, ვიდრე მათ სძინავთ. ჩვენ პუტინს უნდა გავუგზავნოთ გადამწყვეტი სიგნალი, რომ ვიდრე უკრაინაში უკანონო ომს არ შეწყვეტს, მისი ადგილი ამ მაგიდასთან არ იქნება“, – ამბობს სუნაკი.
მანამდე, პრემიერობის კიდევ ერთმა კანდიდატმა და ბრიტანეთის საგარეო საქმეთა მინისტრმა ლიზ ტრასმა განაცხადა, რომ „დიდი ოცეული“ ვერ იქნება ეფექტიანი ორგანო, ვიდრე მის შემადგენლობაში რუსეთია.
აგვისტოს დასაწყისში, უკრაინის პრეზიდენტის მრჩეველმა, მიხაილო პოდოლიაკმა განმარტა, რომ ნოემბერში, ბალიზე დაგეგმილ სამიტზე შესაძლოა უკრაინის პრეზიდენტი ვოლოდიმირ ზელენსკიც გაემგზავროს, თუ დადასტურდება, რომ G20-ის შეხვედრას ვლადიმერ პუტინიც ესწრება.
როგორც დღეს გახდა ცნობილი, ვლადიმერ პუტინი „დიდი ოცეულის“ სამიტზე დასწრებას გეგმავს. მანაც, ზელენსკის მსგავსად, მიწვევა ინდონეზიის პრეზიდენტისგან, ჯოკო ვიდოდოსგან მიიღო.
