მოსამართლე თამარ ბეჟანიშვილს მ.ა.-ს საქმის განხილვის გადადება პროკურორის გამოუცხადებლობის გამო მოუხდა. მ.ა.-ს განზრახ მკვლელობის მცდელობაში ედება ბრალი. სხდომის დაწყებამდე პროკურორმა თორნიკე მარსაგიშვილმა სასამართლოს შეატყობინა, რომ მას ქუთაისის სააპელაციო სასამართლოში მოუწია წასვლა.
„არ მესმის, წინასწარ შეთანხმებულ სხდომაზე რატომ უნდა თქვა უარი მას შემდეგ გამოჩენილი სხვა საქმის გამო. ალბათ იმიტომ, რომ სხვა ინსტანციის სასამართლოა. მე საჯაროდ გამოვხატავ საყვედურს, რადგან თუკი მიუღებელია კონკრეტული დრო, ამის გარკვევა შეიძლებოდა წინა სხდომაზე,“ – თქვა მოსამართლე თამარ ბეჟანიშვილმა.
მოსამართლეს დაცვის მხარის ადვოკატებმა უთხრეს, რომ ისინი პროკურატურასთან საპროცესო შეთანხმებაზე აწარმოებენ მოლაპარაკებას. „თქვენ კი გქონიათ კომუნიკაცია პროკურორთან,“ – მიმართა ადვოკატებს მოსამართლე თამარ ბეჟანიშვილმა და დატოვა სასამართლო სხდომის დარბაზი.
