პირბადის ტარების წესის დარღვევისთვის 30 ნოემბრიდან 13 დეკემბრამდე პერიოდში პოლიციამ სულ 11 853 პირი დააჯარიმა, – აქედან 801 ბოლო 24 საათში. მოქმედი რეგულაციებით პირბადის ტარება სავალდებულოა როგორც დახურულ, ასევე ღია საჯარო სივრცეში.
აღნიშნულ პერიოდში, შინაგან საქმეთა სამინისტროს მონაცემებით, ქვეყნის მასშტაბით, დაწესებული შეზღუდვების ფარგლებში მოქმედი რეგულაციების დარღვევის სულ 12 966 ფაქტი გამოვლინდა.
აქედან 1 113 ფაქტი უკავშირდება იზოლაციისა და კარანტინის წესის დარღვევას [ამ შემთხვევაში დაჯარიმებულთა შორის არიან მოქალაქეები, რომლებმაც 21 საათიდან დილის 5 საათამდე დაწესებული გადაადგილების შეზღუდვის წესი დაარღვიეს], ხოლო 11 853 ფაქტი უკავშირდება პირბადის ტარების წესის დარღვევას.
შსს-ს ინფორმაციით, პირბადის ტარების წესის დარღვევა იწვევს ადმინისტრაციულ პასუხისმგებლობას და ასკ-ის 42(11) -ე მუხლის შესაბამისად ჯარიმას 20 ლარის ოდენობით;
იზოლაციისა და კარანტინის წესის დარღვევა კი, იწვევს ადმინისტრაციულ პასუხისმგებლობას და ასკ–ის 42(10)-ე მუხლის შესაბამისად ფიზიკური პირის დაჯარიმებას 2 000 ლარით, ხოლო იურიდიული პირის – 10 000 ლარის ოდენობით. განმეორებითი ჯარიმა კი სისხლისსამართლებრივ პასუხისმგებლობას ითვალისწინებს.
