ჯონ ჰოპკინსის უნივერსიტეტის 29 ივნისის მონაცემებით, მსოფლიოში კორონავირუსით ინფიცირებულთა რიცხვი 10 მილიონს აღემატება.
2020 წლის იანვარში ჩინეთში ეპიდაფეთქებიდან დღემდე მსოფლიოში კორონავირუსით დაინფიცირდა 10 146 971 ადამიანი. ეს არის მხოლოდ იმ პაციენტების რაოდენობა, რომელთაც კორონავირუსი დაუდასტურდათ კვლევის შედეგად, დაინფიცირებულთა რიცხვი, სავარაუდოდ, ამაზე გაცილებით დიდია.
ბოლო ერთ კვირაში კოვიდინფიცირებულთა რაოდენობა მილიონზე მეტით გაიზარდა. თუ 23 ივნისს მსოფლიოში დადასტურებული იყო ინფიცირების 9 100 090 შემთხვევა, დღეს, 29 ივნისს, ეს რიცხვი 10 146 971-ს აღწევს.
ექვს თვეში, იანვრიდან ივნისის ბოლომდე, ახალი კორონავირუსული ინფექციით მსოფლიოში გარდაიცვალა 501 940 ადამიანი, მათგან ყველაზე მეტი – 125 803 ადამიანი – ამერიკის შეერთებულ შტატებში; 57 622 – ბრაზილიაში და 43 634 – დიდ ბრიტანეთში.
კორონავირუსისგან განიკურნა 5 142 425 ადამიანი.
__________________________
ფოტოზე: ბრაზილიაში, ვილა ფორმოზას დიდ სასაფლაოზე ახალ საფლავებს თხრიან კორონავირუსით გარდაცვლილთათვის.
ფოტო: ევროპის პრესფოტო სააგენტო. EPA/Sebastiao Moreira
