ქედის მერიის თანამშრომელი ბათუმში, სასტუმრო „ეიფორიასთან“ დააკავეს. წინასწარი ინფორმაციით, გამოძიება ქედის მერიის ზედამხედველობის სამსახურის უფროს სპეციალისტს – ტარიელ თურმანიძეს ქრთამის აღებას ედავება.
„არაფერი ვიცი, დამირეკეს, რომ ასე დაუკავებიათ. არ ვიცი, რა საქმეს ეხება,“ – გვითხრა ქედის მერმა, ლევან გორგილაძემ.
დაკავებული უკვე გადაიყვანეს თბილისში, რადგან საქმეს ანტიკორუფციული სამსახური იძიებს. ამ სამსახურში ინფორმაციის მოწოდებას დაგვპირდნენ და მას მიღებისთანავე გაგაცნობთ.
ადვოკატი ზაზა პაპიძე ამბობს, რომ დაკავებულს უკვე შეხვდა, თუმცა დაირღვა სამართლებრივი პროცედურა.
„ერთი საათი ველოდი შეხვედრას. კანონის მიხედვით, დაუყონებლივ უნდა შეგვახვედრონ ჩვენი დაცვის ქვეშ მყოფებს… ჯერ საქმის დეტალებზე ვერაფერს გეტყვით,“ – აღნიშნავს ზაზა პაპიძე.
