„წიგნები მაღალმთიან სოფლებს“ არასამთავრობო ორგანიზაცია „ნაბიჯი წინ“ -ის პროექტია.
„თავიდან წიგნები გადმოგვცა გამომცემლობა „ინტელექტმა“, „არტანუჯმა“, „საუნჯემ“ და „რადარამმა“. თბილისში წიგნის მაღაზია „ბუქ სითიში“ და კაფე-ბარ „არსადში“, დგას ჩვენი ყუთები სადაც ნებისმიერ მსურველს შეუძლია მიიტანოს წიგნები. ვაგროვებთ მაკულატურასაც რომელსაც „პალიტრა-ელის“ პროგრამით ვცვლით ახალ წიგნებში. შეგროვილ წიგნებს გადავცემთ პირველ ეტაპზე სოფელ ბარისახოს საჯარო სკოლას ასევე შუაფხოს საჯარო სკოლას. შემდეგი გასვლები იქნება უკვე მაღალმთიან აჭარაში, კერძოდ ხულოს რაიონის რამდენიმე სოფელი გვაქვს შერჩეული,“ – ამბობს პროექტის ავტორი და ხელმძღვანელი თეკლა ქველაძე.
მისივე თქმით თიბისი ბანკის დაფინანსებით ამჟამად სოფელ ბარისახოს საჯარო სკოლაში ბიბლიოთეკა და სამკითხველო ოთახი რემონტდება.
„სულ მაწუხებდა მაღალმთიანი რაიონების პრობლემები. ძალიან ცუდი მდგომარეობაა, სოფლები იცლება სისტემატიურად და ეს პროცესი გრძელდება წლებია. მთაში დარჩენილ ადამიანებს, ახალგაზრდებს არ აქვთ წვდომა თანამედროვე ლიტერატურაზე, ასევე იმ არტ-პროცესებთან რომელიც ქვეყანაში მიმდინარეობს. ამიტომაც გადავწყვიტე რაღაცით შემემსუბუქებინა მათი ყოფა მთაში და მეგობრების მხარდაჭერით წამოვიწყე ეს პროექტი,“ – ამბობს თეკლა ქველაძე.
მაღალმთიან აჭარაში წასაღები ბათუმში, წიგნების მაღაზია „წიგნები ბათუმში“ გროვდება. პროექტში ჩართვა ნებისმიერ მსურველს შეუძლია.
