ცოფისა და მასთან დაკავშირებული რისკების, ასევე ცხოველებთან ქცევისა და ვაქცინაციის მნიშვნელობის შესახებ მოსწავლეებს ჯანდაცვის ცენტრის წარმომადგენლებთან ერთად მათივე თანატოლი, წმ. ანდრია პირველწოდებულის სახელობის სკოლის მოსწავლე, თეკლა კილაძე ესაუბრა.
N16 სკოლის მოსწავლეებს დაურიგდათ თემატური ფლაერები და პოსტერები – „როგორ მოვიქცეთ ცხოველებთან”.
საზოგადოებრივი ჯანდაცვის ინფორმაციით, ცოფი ზოონოზური (გადაეცემა ცხოველიდან ადამიანს) დაავადებაა, რომელსაც ცოფის ვირუსი იწვევს. ცოფის კლინიკური სიმპტომების გამოვლენისას – ის პრაქტიკულად ყოველთვის სიკვდილით მთავრდება.
ცოფი ენდემურია მთელი მსოფლიოსთვის, ანტარქტიდის გარდა. ყველაზე მაღალი ინციდენტობით გამოირჩევა აზია და აფრიკა, სადაც ცოფის განვითარების რისკის ქვეშაა 3 მილიარდ ადამიანზე მეტი.
ცოფი 100%-ით ვაქცინით მართვადი დაავადებაა. მიუხედავად იმისა, რომ არსებობს დაავადების პრევენციის საშუალება, ცოფი მსოფლიოში ყოველწლიურად ათობით ათასი სიკვდილის მიზეზი ხდება. დაავადება დისპროპორციულად აზარალებს ღარიბ, დაბალი შემოსავლების მქონე მოსახლეობას/თემს/სახელმწიფოებს, განსაკუთრებით კი ბავშვებს – ცოფით ყოველი 10 გარდაცვლილიდან ოთხი – 15 წლამდე ასაკის ბავშვია.
საზოგადოებრივი ჯანდაცვის ცენტრის ინფორმაციით, საქართველოში 2014 წელს ცოფით 4 ადამიანი გარდაიცვალა. 2015 წელს, ადამიანებში ცოფის შემთხვევა არ დაფიქსირებულა.
