გონიოელებს კარვის აღება პოლიციელებმა აიძულეს. კარავი საპროტესტო აქციის მონაწილეებს კონსტანტინე გამსახურდიას ქუჩაზე ჰქონდათ გაშლილი, აჭარის მთავრობის სახლის წინ. სამოქალაქო ფორმაში ჩაცმული ათეულობით პოლიციელი ადგილზე ჯერ კიდევ მაშინ გამოჩნდა, როცა გონიოელებმა ქუჩა გადაკეტეს და მეგაფონიდან მიმართეს აჭარის მთავრობას.
“მოვიდეს პოლიციელი პოლიციელის ფორმით და მას დავემორჩილები”, – მიმართა სამოქალაქო ფორმიან სამართალდამცველს აქციის ერთ-ერთმა მონაწილე, ენვერ ირემაძემ. ამ მოწოდების შემდეგ კარავთან ფორმიანი პოლიციელი გამოჩნდა. სამართდამცველებს აქციის მონაწილეებმა უთხრეს, რომ ისინი მთავრობამ მიწის გარეშე დატოვა და არსად წასვლას არ აპირებენ. საბოლოოდ კარავი აქციის მონაწილეებმა ისევ ბათუმის საკრებულოს შენობასთან დააბრუნეს.
პოლიციელებმა აქციის მონაწილეებს ლეიბები წაართვეს, რომელიც აქციის მონაწილეებს ტროტუარის მიმდებარედ, ბალახიან საფარზე ჰქონდათ გაშლილი. ლეიბების აღება პოლიციელბმა მაშინ მოითხოვეს, როცა კარვის გადატანის მოთხოვნა დაკმაყოფილდა და აქციის მონაწილე ენვერ ირემაძემ შიმშილობა დაანონსა. დაკავებულია აქციის ერთ-ერთი მონაწილე იასონ პაქსაძე, “ბათუმელებთან” ტელეფონით საუბრის დროს მან თქვა, რომ ის პოლიციის მე-3 განყოფილებაშია გადაყვანილი. მისთვის უცნობია, რის გამო დააკავეს. დაკავების შესახებ შინაგან საქმეთა სამინისტროს კომენტარი ამ დრომდე არ გაუკეთებია.
საია-ს აჭარის ფილიალის თავმჯდომარის, გიორგი ხიმშიაშვილის შეფასებით, კარვის დადგმის უფლება მოქალაქეებს ჰქონდათ, თუკი იგი ტროტუარს არ კეტავდა და დაწესებულებაში შესასვლელი თავისუფალი რჩებოდა.
