უკრაინული გამოცემა „უკრაინსკა პრავდა“ წყაროებზე დაყრდნობით წერს, რომ 14 ოქტომბრის ღამეს უკრაინის საჰაერო თავდაცვას შეეზღუდა წვდომა ამერიკული Starlink-ის თანამგზავრული საკომუნიკაციო სისტემის სამხედრო ვერსიაზე, Starshield-ზე, რომელიც უფრო სწრაფად მუშაობს და აუცილებელია დრონების ოპერატორებისთვის.
გამოცემა აღნიშნულ ინფორმაციას ფრონტის ხაზზე მყოფ ოთხ წყაროზე დაყრდნობით ავრცელებს. ამავეს აცხადებს სერგეი სტერნენკო, უკრაინის თავდაცვის მინისტრის მრჩეველი, ცნობილი ბლოგერი.
„Starlink-ის ტერმინალები ღამით შეიზღუდა. სიგნალები 160 კმ/სთ-ზე მეტი სიჩქარით მოძრაობისას გაქრა. ამან ხელი შეუშალა არაერთ მნიშვნელოვან მისიას. SpaceX-მა, სავარაუდოდ, ამ ზომებს ტრამპის ადმინისტრაციის მოთხოვნით მიმართა“ – წერს სტერნენკო ფეისბუქზე.
„უკრაინსკა პრავდა“ წერს, რომ ერთ-ერთმა მეთაურმა უკრაინის თავდაცვის სამინისტროს გაუგზავნა ვიდეო, სადაც ნათლად ჩანს, თუ როგორ „კარგავენ“ ორი უკრაინულ დრონთან კონტაქტს, რაც ხელს უშლის სამხედრო მისიის გაგრძელებას.
გამოცემის ცნობით, ოფიციალური ცნობებით, უკრაინამ Starshield-ის გამოყენება 2024 წელს დაიწყო.
14 ოქტომბერს, ღამით, რუსეთი ბალისტიკური რაკეტებითა და დრონებით დაესხა თავს უკრაინის დედაქალაქს. კიევში მინიმუმ 3 ადამიანი დაიღუპა რუსეთის შეტევის შედეგად.
უკრაინის პრეზიდენტის, ვოლოდიმირ ზელენსკის განცხადებით, თავდასხმის შესახებ პარტნიორების მხრიდან წინასწარი გაფრთხილება არ ყოფილა.