რუსეთის ღამის თავდასხმა კიევზე – დაიღუპა ორი ადამიანი

ორშაბათს, 5 იანვარს, ღამით, რუსეთის მიერ უკრაინის დედაქალაქ კიევსა და კიევის რეგიონზე განხორციელებული თავდასხმის შედეგად 2 ადამიანი დაიღუპა.

რუსეთმა კიევში კერძო სამედიცინო დაწესებულებას დაარტყა, აფეთქება მეორე სართულზე მოხდა, სადაც სტაციონარული განყოფილება იყო განთავსებული.

„ხანძარი ჩამქრალია. შენობის დათვალიერებისას ადამიანის ცხედარი აღმოაჩინეს. 25 ადამიანი ევაკუირებულია, სამი დაშავდა“, – იუწყება უკრაინის საგანგებო სიტუაციების სამსახური.

კიდევ ერთი ადამიანი, 1951 წელს დაბადებული კაცი დაიღუპა კიევის ოლქში, საკუთარ სახლში, რომელსაც რუსეთის მიერ ნასროლი დრონი მოხვდა, რამაც ხანძარი გამოიწვია. მაშველებმა კაცის ცხედარი ხანძრის ჩაქრობის შემდეგ აღმოაჩინეს.

უკრაინული მედიის ცნობით, უკრაინაზე ღამით განხორციელებული თავდასხმის დროს რუსეთმა 165 დრონი გამოიყენა, მათ შორის დაახლოებით 100 „შაჰიდი“ იყო. უკრაინის თავდაცვამ მათი მნიშვნელოვანი რაოდენობა, 137, ჩამოაგდო ან გაანეიტრალა.