ქალაქი ბუნების პირისპირ – ქართველი და უცხოელი ხელოვანების გამოფენა ბათუმში

ბათუმში, „თანამედროვე ხელოვნების სივრცეში“, ქართველი და ევროპელი ხელოვანების ერთობლივი საგამოფენო პროექტი – ქალაქი ბუნების პირისპირ გაიხსნა.  გამოფენაზე წარმოდგენილია ქართველი, ესპანელი და სერბი ხელოვანების ნამუშევრები.

ქალაქი ბუნების პირისპირ – ორი ერთმანეთისაგან სრულიად დამოუკიდებელი პროექტის სინთეზია და ფოკუსირდება ბუნებისა და ქალაქის კონცეფციაზე. „კერძოდ, გამოხატავს ურბანიზაციის დაპირისპირებას ჰარმონიულ ბუნებასთან.

ხელოვანების მიზანია ადამიანები დააფიქრონ სამყაროს მომავალზე – იმაზე, რომ ჯანსაღ გარემოს, რაც ასე მნიშვნელოვანია, მოფრთხილება სჭირდება. ხელოვნება ამ შემთხვევაში სამოქალაქო აქტივიზმის ფორმასაც იძენს,“-ამბობენ გამოფენის ავტორები.

გამოფენაზე გამოყენებულია ფოტოგრაფია, ფერწერა, კოლაჯი, გრაფიტი, ინსტალაცია, პროექცია.

ლაშა მახარაძის თქმით, მის ნამუშევრებში ნაჩვენებია ქალაქი თავისი ხმაურით, ინფორმაციის ჭავლით, დაბინძურებული გარემოთი, როცა ქალაქს ადამიანები შავ-თეთრ ფერებში აღვიქვამთ. „ნამუშევრებს თუ დავაკვირდებით, ადამიანების გამოსახულებები სარეცხებივით არის გაფენილი ამ გარემოში და ჩვენ უნდა გავაანალიზოთ, როგორი კავშირი გვაქვს ბუნებასთან“.

 

გამოფენა „თანამედროვე ხელოვნების სივრცეში“ 3 ივნისამდე გაგრძელდება.