Batumelebi | ბათუმის ახალი სასაფლაო ჩაქვში გაიხსნება ბათუმის ახალი სასაფლაო ჩაქვში გაიხსნება – Batumelebi
RU | GE  

ბათუმის ახალი სასაფლაო ჩაქვში გაიხსნება

 

იმის გამო, რომ ფერიის სასაფლაო გადატვირთულია, აიპი «ბათუმის სასაფლაო» აპირებს წინადადებით შევიდეს საკრებულოში, რომ ახალი ადგილები ამ სასაფლაოზე აღარ გამოიყოს. მის ნაცვლად ქალაქს, ახალი სასაფლაო მოემსახურება.

აჭარის ფინანსთა და ეკონომიკის სამინისტრომ ბათუმის თვითმმართველობას ახალი სასაფლაოსთვის ფართი უკვე გადასცა. ბათუმის საკრებულოს პრესსამსახურის ინფორმაციით, 17 ჰექტარი ტერიტორია, რომელიც ჩაქვში, გვირაბიდან ერთი კილომეტრის დაშორებით, ხელმარცხნივ მდებარეობს,  საკრებულოს უახლოეს სხდომაზე გადაეცემა აიპის “ბათუმის სასაფალაოს” სამართავად. ამასთან, აღნიშნული ტერიტორიის მოსაწესრიგებლად მათ 30 000 ლარი გადაერიცხებათ.

ერთ–ერთი სასაფლაო ფერიის მთაზე

აიპი “ბათუმის სასაფლაოს” დირექტორის, ლაშა ბერძენიშვილის თქმით, თითქმის გადატვირთულია ქალაქის მეორე, ე.წ. ურეხის სასაფლაოც, ამიტომ ქალაქისთვის აუცილებელი იყო ახალი ფართი, ახალი სასაფლაოსთვის.

საფლავის ფასი ახალ სასაფლაოზე იგივე დარჩება, ამ ეტაპზე ფერიისა და ურეხის სასაფლაოებზე, ერთადგილიანი საფლავი 150 ლარი ღირს, დაკრძალვის მომსახურების ღირებულება კი 100 ლარია.

მას შემდეგ, რაც ახალი სასაფლაოს ფართი აიპი “ბათუმის სასაფლაოს” გადაეცემა, დაახლოებით ერთ კვირაში ტენდერი გამოცხადდება ინფრასტრუქტურულ სამუშაოებზე, რის შემდეგაც დადგინდება ზუსტი დრო, თუ რა ვადებში დასრულდება სასაფლაოს კეთილმოწყობა. ლაშა ბერძენიშვილის თქმით, ამ ყველაფერს, სავარაუდოდ, ოთხი თვე დასჭირდება.

ნეტგაზეთის მასალების სხვა გამოცემებში გადაბეჭდვის წესი
ია ფრანგიშვილი