ქობულეთის მერია ზღვის პირას, ბულვარის სასეირნო ბილიკზე ვეტერანთა კლუბის შენობის აშენებას გეგმავს. მშენებლობისთვის კი ადგილობრივი ბიუჯეტიდან 234 ათას 914 ლარია გამოყოფილი. სწორედ ამ თანხით ტენდერი უკვე გამოცხადებულია.
ქობულეთის ბულვარში ვეტერანთა კლუბის შენობას იმ ზოლში ჩადგამენ, რომლის სიგანე სულ რაღაც 20 მეტრია. პროექტში აღნიშნულია, რომ დასაშლელი იქნება სამშენებლო ტერიტორიაზე არსებული გაზონი, ველო-სადგომი, ელექტროგანათების ბოძი, ამასთან გადასატანი იქნება დეკორატიული განათება, სანაგვე ურნები, წყლის შადრევანი და სხვა.
აღსანიშნავია ისიც, რომ ქობულეთის კლუბის შენობა თითქმის ზუსტად ისეთივე იქნება, როგორიც ბათუმის ბულვარში არსებული ვეტერანთა კლუბის [„ნონას“] შენობაა.
ვეტერანთა კლუბის მშენებლობაზე გამოცხადებულ ტენდერში წინადადებების მიღება 2026 წლის 23 ოქტომბერს დაიწყება და 26 ოქტომბერს დასრულდება.
პირობის მიხედვით, მშენებლობა ტენდერში გამარჯვებულთან ხელშეკრულების დადების მომდევნო დღიდან 180 დღეში უნდა დასრულდეს.