ბათუმის ცენტრალურ პარკში დაგეგმილია არსებული საპირფარეშოს შენობის რემონტი, პარკის შესასვლელში [კოლონადებთან] მდებარე ხის შენობის დაშლა და ახლის, ლითონისა და სენდვიჩ-პანელების კონსტრუქციით აშენება, პარკში არსებული ერთ-ერთი ჯიხურის რემონტი და დამატებით ერთი კონსტრუქციის, საზოგადოებრივი სივრცის მშენებლობა.
წინადადებების მიღება 2025 წლის 12 ივნისს დაიწყება და 17 ივნისს დასრულდება, სამუშაოები კი ტენდერში გამარჯვებულთან ხელშეკრულების დადებიდან 2025 წლის 10 დეკემბრის ჩათვლით პერიოდში უნდა დასრულდეს.
ტენდერის პირობების გათვალისწინებით, გამოდის, რომ ცენტრალურ პარკში საპირფარეშო არც წელს იფუნქციონირებს. არ იქნება საზოგადოებრივი სივრცეც [შენობა] კოლონადებთან – რა თქმა უნდა, თუ ტენდერი შედგა.
ტენდერს ახლავს შესაბამისი პროექტები, რომელთა მიხედვითაც უნდა ჩატარდეს სამუშაოები.
ახალი შენობა გეგმაში ოთხკუთხა მარტივი ფორმისაა, ერთსართულიანია, დახურული და ღია სივრცეებით [დარბაზი, აივანი]. შენობას გააჩნია ერთი შესასვლელი მოწყობილი პეტრე მელიქიშვილის ქუჩის მხრიდან.
შენობის კონსტრუქცია შედგენილია ფოლადის ელემენტებით [დგარები, კოჭები, ფერმა] და გადახურულია სენდვიჩპანელით. შენობა ბუნებრივადაა განათებული ალუმინის ვიტრაჟებით და ვიტრაჟკარებით…“.
პარკში მდებარე საპირფარეშოს შენობა, როგორც პროექტშია აღნიშნული: „სანტექნიკური, ელექტროსისტემის გაუმართაობისა და შიგა მოპირკეთების დაზიანების გამო უფუნქციოა. საპროექტო დოკუმენტაცია ითვალისწინებს სანტექნიკური და ელექტროტექნიკური სისტემების ახლად მოწყობას. შენობასთან ეწყობა ახალი სკანალიზაციო ჭა, რომელიც დაუკავშირდება არსებულ საქალაქო საკანალიზაციო სისტემას.
სარემონტო სამუშაოები ითვალისწინებს შიგა მოპირკეთების სრულ დემონტაჟს [იატაკის ფენა საფუძვლით, კარ-ფანჯრები, შეკიდული ჭერი, კაფელი, საღებავის
არსებული ფენა] და ახლის მოწყობას. პროექტით არსებულ დამხმარე ფართში ეწყობა სველი წერტილი შშმს-ის.
შენობის ბრტყელი გადახურვის ფენილს საფუძვლითურთ უტარდება დემონტაჟი და ეწყობა ახალი რბილი სახურავი [სახურავის ზემოდან განთავსებული ხე-მცენარის განშტოებების გამო, საჭიროა სახურავის სისტემატური დასუფთავება]…“ – აღნიშნულია პროექტში.
გაარემონტებენ ამ შენობასაც, რომელიც ცენტრალურ პარკში ტბის პირას, უნივერსიტეტის მხარესდგას.
პროექტში აღნიშნულია, რომ „ამჟამად შენობას ფუნქციური დატვირთვა არ გააჩნია და უმოქმედოა. მოქმედების პერიოდში შენობა გააჩნდა კაფეს ფუნქცია.
რიგი მიზეზების გამო პროექტირებისას ვერ მოვახერხეთ შენობის შიგა სივრცეში შეღწევა. ასევე გადმოცემით გავიგეთ, რომ შენობაში განთავსებულია შადრევნის სისტემის მართვის პანელი და ელექტროკარადები.
დამკვეთის ზეპირსიტყვიერი დავალების საფუძველზე ვახდენთ აღნიშნული მართვის პანელისა და ელექტროკარადების დემონტაჟს დასაწყობებით, ხოლო სარემონტო სამუშაოების დასრულების შემდეგ ხარჯთაღრიცხვაში გათვალისწინებულია ხელახალი მონტაჟის ხარჯები…“
