დღეს, 13 აპრილს, ფეისბუქში გავრცელდა გელათის მონასტერზე აღმართული ჯვრის ფოტო შინაარსით, რომ თითქოს მონასტერზე რუსული ჯვრის აღმართვა მიმდინარეობს. ფოტოს სოციალურ ქსელში დიდი გამოხმაურება მოჰყვა.
“ბათუმელებმა” გადაამოწმა და დაადგინა, რომ რეალურად არა აღმართეს, არამედ ტაძრის გუმბათიდან მოხსნეს მე-19 საუკუნეში აღმართული ჯვარი. ჯვრის მოხსნის მიზეზი გელათის სამონასტრო კომპლექსში მიმდინარე რეაბილიტაციაა.
გელათის მთავარ ტაძარზე აღმართული ჯვარი მე-19 საუკუნისაა. მისი ჩამოხსნა, სარეაბილიტაციო სამუშაოებს უკავშირდება.
სამოქალაქო აქტივისტი და ორგანიზაცია „ევროპა ჩვენი სახლიას“ დამფუძნებელი თორნიკე ბარათაშვილი წლებია აქტიურად ადევნებს თვალს გელათის რეაბილიტაციის პროცესს. ის წლების განმავლობაში ფოტოებით, დოკუმენტურად ასახავს ძეგლის ირგვლივ მიმდინარე სამუშაოებს.
თორნიკე ბარათაშვილი “ბათუმელებთან” ამბობს, რომ სოციალურ ქსელებში “გელათზე რუსული ჯვრის აღმართვის” შესახებ არასწორი ინფორმაცია გავრცელდა.
მისი განმარტებით, აღნიშნული ჯვარი, მე-19 საუკუნიდან არის აღმართული გელათის მთავარ ტაძარზე და ამჟამად მისი ჩამოხსნა სარეაბილიტაციო სამუშაოებს უკავშირდება.
„სინამდვილეში, იხსნება ჯვარი, კი არ იდგმება. მე-19 საუკუნიდან ეგ ჯვარი დგას გელათის თავზე. მაშინ რუსული, ერთიანი სივრცე იყო, ეგზარხოსობის დროს არის დადგმული და ახლა ამაზე იმის თქმა, რომ რუსული იდგმება, შესაძლოა უფრო აწყობდეს პროპაგანდას. ანუ არ არის სასიკეთო გელათის ინტერესებისთვის.
პრობლემა უბრალოდ ისაა, რომ ახლა იხსნება ჯვარი, რადგან ეს ყველაფერი აქამდეც უნდა დასრულებულიყო.
ახლა იხსნება იმიტომ, რომ რეაბილიტაციის პროცესი მიმდინარეობს და კონსტრუქციები ადის იქამდე, სადაც ჯვარია. უნდა გადაიხუროს ხომ? ამიტომ კონსტრუქციას უშლის ხელს და შესაბამისად, ეს ტრაგიკული მოცემულობა დადგა.
ამ დაუსრულებელმა დროებითმა გადახურვებმა აგერ ახლა ააღწია გუმბათამდე, რომელიც წესით გასულ წელს უნდა დასრულებულიყო და ვეღარ დასრულდა, ახლა გვპირდებიან, რომ მაისში დასრულდება და ბოლო-ბოლო მიადგა კონსტრუქციები ამ ჯვრის ნიშნულს, ამიტომ გახდა მათი აზრით ჯვრის მოხსნა აუცილებელი.
ის მოცემულობა გვექნება, რომ რამდენიმე წელი გელათის ძირითად ტაძარს არ ექნება ჯვარი. მაგრამ, ეს რომ რუსულია და ახლა იდგმება, შეიძლება შემოგდებულიც კი იყოს ეს ამბავი, რომ ილაპარაკოს არაინფორმირებულმა საზოგადოებამ.
ხოლო იმ ნახევარმთვარეს რაც ჯვრის ქვეშ არის გამოსახული, სიმბოლური დატვირთვა აქვს, რაც ნიშნავს ქრისტიანობის წარმართობაზე გამარჯვებას და რუსულ ფაქტორზე ხაზგასმა არასწორი მგონია. ეს უკვე ისტორიული ჯვარია და პირიქით, მე გავაპროტესტებდი რომ მოეხსნათ და რაიმე სხვა მასალით ჩაენაცვლებინათ.
ამიტომ, ამაზე პედალირება, რომ ჯვარი რუსულია და თან იდგმება, დეზინფორმაციაა,“-ამბობს თორნიკე ბარათაშვილი „ბათუმელებთან“.
გელათის რეაბილიტაციის პროცესი რამდენიმე წლის დაიწყო, თუმცა არასწორად და არადროულად შესრულებული სამუშაოების შედეგად ტაძარი დაზიანდა. სახურავიდან ჩამოსულმა წვიმის წყალმა კი სერიოზულად დააზიანა ტაძრის ფრესკებიც.
2023 წლიდან, ტაძრის რეაბილიტაციაზე პასუხისმგებლობა „ქართული ოცნების“ ხელისუფლებამ საპატრიაქროს გადააბარა. 2024 წელს გელათის რეაბილიტაციისთვის მთავრობამ საპატრიარქოს 7.5 მლნ ლარი გამოუყო.
შეიქმნა გელათის რეაბილიტაციის კომიტეტი, რომლის ინფორმაციით, ამ დროისთვის გელათის სამონასტრო კომპლექსში ღვთისმშობლის შობის სახელობის ტაძრის გუმბათის გადახურვის მეორე ფაზის, მეორე ეტაპის სამუშაოები დასრულდა. მათივე ინფორმაციიც, დაწყებულია მთავარი ფაზა, – გელათის კათედრალის გუმბათის გადახურვის სამუშაოები.
