კომპანია „ამბასადორი ბათუმი აილენდი“, რომელმაც ბათუმში ხელოვნური კუნძული უნდა ააშენოს, გეგმავს, რომ 4-5 ცათამბჯენი უკვე მოწყობილ ნახევარკუნძულზე ააშენოს, დანარჩენ ტერიტორიას კი, რომელიც ხელოვნურად ამის შემდეგ უნდა მოაწყოს ზღვაში, სტრატეგიული გარემოსდაცვითი შეფასების [სგშ] პროცედურის დასრულების შემდეგ აითვისებს.
ხელოვნურად შექმნილი მიწა ზღვაში [ერთ-ერთი ნახევარკუნძული], რომელსაც „ამბასადორი“ აშენებს
ამ განაშენიანების გეგმის სტრატეგიული გარემოსდაცვითი შეფასების [სგშ] სკოპინგის ანგარიში კი განსახილველად და სკოპინგის დასკვნის მისაღებად გარემოს ეროვნულ სააგენტოშია გადაგზავნილი.
„ამბასადორი ბათუმი აილენდი“ თვლის, რომ სკოპინგის დასკვნის მიღებამდე შესაძლებელია 4-5 შენობის მშენებლობა უკვე მოწყობილ [ხელოვნურად შექმნილ] ნახევარკუნძულზე, ხოლო დანარჩენი ფართობს აითვისებს სგშ-ს პროცედურის საფუძველზე, შესაბამისი რეკომენდაციების გაცემის შემდგომ.
„ორ ნახევარკუნძულზე, ერთ კუნძულზე სტრატეგიული გარემოსდაცვითი შეფასების განხორციელებამდე შესაძლოა განხორციელდეს არაუმეტეს 4-5 შენობა-ნაგებობის მშენებლობა, დანარჩენი ფართობის ათვისება განხორციელდება აღნიშნულ დოკუმენტზე სგშ-ს პროცედურის საფუძველზე, შესაბამისი რეკომენდაციების გაცემის შემდგომ“, – აღნიშნულია დოკუმენტებში.
ამ დოკუმენტების მიხედვით, ეს 4-5 შენობა-ნაგებობა ჯამურად განთავსდება 8,4 ჰექტარზე, ხოლო 1.3 ჰექტარი გათვალისწინებულია საზოგადოებრივი დანიშნულების პარკის მოსაწყობად [ამჯერად სულ საუბარია 99 797 კვ.მ ფართობზე]:
სიტუაციური ნახაზი / ყვითელი ფერით მონიშნულია ტერიტორია [99 797 კვ.მ] სადაც „ამბასადორი“ 5 ცათამბჯენის მშენებლობის დაწყებას გეგმავს მანამდე, ვიდრე ხელოვნურ კუნძულს ააშენებს. ეს ტერიტორია უკვე ხელოვნურად მოწყობილ მიწაზეა / ფოტო სკოპინგის ანგარიშიდან
ყოველივე აღნიშნულიდან გამომდინარე გთხოვთ წარმოდგენილი სიტუაციური ნახაზის შესაბამისად მონიშნულ ტერიტორიაზე [ჯამური ფართობით 99 797 კვ.მ.] განაშენიანების დეტალურ გეგმაში შესაძლებლად დააფიქსიროთ 5 შენობა-ნაგებობაზე შესაბამისი სანებართვო პროცედურების წარმოება.
გარემოს ეროვნილი სააგენტოს მიერ გაცემული სკოპინგის შემდგომ დაგვიმტკიცოთ განაშენიანების დეტალური გეგმის კონცეფცია, ხოლო განაშენიანების დეტალური გეგმა დაგვიმტკიცოთ პირობიანი ვალდებულებით. კერძოდ ის გავრცელდეს ხსენებული სექტორის მოცემულ არეალზე და დანარჩენ ნაწილზე გდგ ძალაში შევიდეს გარემოს ეროვნული სააგენტოს მიერ სგშ-ს დამტკიცების შემდეგ“, – წერს „ამბასადორი ბათუმი აილენდი“ სივრცითი და ქალაქთმშენებლობითი განვითარების სააგენტოს 2024 წლის 27 სექტემბრით დათარიღებულ წერილში.
ზოგადად, განაშენიანების გეგმის სტრატეგიული გარემოსდაცვითი შეფასების [სგშ] სკოპინგის ანგარიში ეხება მთლიანად როგორც ასაშენებელი ნახევარკუნძულებისა და კუნძულის ტერიტორიას, ასევე ორ მიწის ნაკვეთს ბარცხანა-ბენზეს სანაპირო ზოლში. ამ ნაკვეთებიდან ერთი ბათუმის მერიის საკუთრებაშია, ხოლო მეორე აჭარის ავტონომიური რესპუბლიკის საკუთრებაში.
1. ხელოვნური ნახევარკუნძულებისა და კუნძულის მოსაწყობად „ამბასადორზე“ გადაცემული 1 443 223 კვ/მ ტერიტორია ზღვაში [იასამნისფერი]; 2. აჭარის საკუთრებაში და „ამბასადორზე“ იჯარით გადაცემული 3 445 კვ/მ ტერიტორია [წითელი ფერით] და ბათუმის მუნიციპალიტეტის საკუთრებაში არსებული პლაჟის ზოლი – 27 046 კვ/მ [ყვითელი ფერით]
ხელოვნური კუნძულისა და ნახევარკუნძულების განაშენიანების კონცეფცია / ფოტო სკოპინგის ანგარიშიდან
განაშენიანების კონცეფციაში აღნიშნულია, რომ „ხელოვნური კუნძულის ტერიტორიის გამოყენება მოხდება კომერციული, გასართობი, სპორტული, საგანმანათლებლო, რეკრეაციული, საცხოვრებელი და ტურისტული ინფრასტრუქტურის მოსაწყობად.“
ხელოვნური კუნძულისა და ნახევარკუნძულების განაშენიანების კონცეფცია / ფოტო სკოპინგის ანგარიშიდან
„ამბასადორის“ კონცეფციის მიხედვით, „ურბანული განვითარების კოეფიციენტებისა და ბაზრის ათვისების მაჩვენებლების გათვალისწინებით, კუნძულზე მოაზრებულია 2.36 მილიონი კვადრატული მეტრი საერთო ფართობის განვითარება“.
ნახევარკუნძულებზე ჯამში 24 მაღალსართულიანი [40-50 სართული] შენობის აშენებაა დაგეგმილი. უშუალოდ კუნძულზე კი დაბალი განაშენიანება იქნება [ვილებისთვის].
ხელოვნური კუნძულისა და ნახევარკუნძულების განაშენიანების კონცეფცია / ფოტო სკოპინგის ანგარიშიდან
ბათუმში, შპს „ამბასადორი ბათუმი აილენდის“ მიერ შავი ზღვის აკვატორიაში ხელოვნური კუნძულის მოწყობაზე გარემოს ეროვნულმა სააგენტომ გარემოსდაცვითი გადაწყვეტილება 14 აგვისტოს გასცა:
რას სთხოვენ „ამბასადორს“ დამატებით – ხელოვნური კუნძულის გზშ დამტკიცებულია
„ამბასადორი ბათუმი აილენდი“ ამჯერადაც და ადრეც დოკუმენტებში ხშირად მიუთითებს, რომ ხელოვნური ნახევარკუნძულებისა და კუნძულის შექმნა „განსაკუთრებით მნიშვნელოვანია, რადგან მდინარე ჭოროხის მიერ შემოტანილი მყარი ნატანის მკვეთრად შემცირების ფონზე, ინტენსიურად მიმდინარეობს სანაპირო ზოლის წარეცხვის და სანაპირო ტერიტორიის მიტაცების პროცესი.“
აქ აღსანიშნავია, რომ სპეციალისტების მიერ რეკომენდებულია მდინარის [განსაკუთრებით ჭოროხის დელტასა და მის მიმდებარედ არსებული] ნატანი მასალა [ქვიშა/ხრეში] აუცილებლად იქნას გამოყენებული მხოლოდ ბათუმის სანაპირო ზოლისა და პლაჟების შესანარჩუნებლად.
მიუხედავად ამისა, საქართველოს მთავრობამ „ამბასადორი ბათუმი აილენდს“ მშენებლობისთვის ხრეშის მოპოვების უფლება ჭოროხიდანაც მისცა.
ამ თემაზე:
კუნძულისთვის ხრეშს ჭოროხიდანაც ამოიღებენ – მთავრობამ „ამბასადორს“ ადგილი 3 წლით გადასცა
