წუხელ, გვიან ღამით, უკრაინის ქალაქ ხარკოვზე სარაკეტო თავდასხმის შედეგად განადგურებულ ერთ-ერთ სასტუმროში ქართველი რეპორტიორი დავით კაჭკაჭიშვილი იმყოფებოდა. დავით კაჭკაჭიშვილი ამ ეტაპზე თურქული სააგენტო „ანადოლუსთვის“ მუშაობს.
ჟურნალისტის თქმით, სასტუმროს ორი რაკეტა მოხვდა.
დავით კაჭკაჭიშვილი პირდაპირ ჩართვაში გვიან ღამითვე მოუყვა „ანადოლუს“ მაყურებელს იმის შესახებ, რომ ხარკოვში სარაკეტო თავდასხმის შედეგად დაშავდნენ ადამიანები, განადგურდა ერთ-ერთი სასტუმრო და დაიწვა მანქანები, მათ შორის რეპორტიორის მანქანაც.
დავით კაჭკაჭიშვილის თქმით, მან სარაკეტო თავდასხმის შედეგად მცირე დაზიანება მიიღო. ასევე დაშავდა მისი ერთ-ერთი კოლეგა.