ომის კვლევის ამერიკული ინსტიტუტი ISW-ი 12 ნოემბერს გამოქვეყნებულ რუსეთ-უკრაინის ომის მიმოხილვაში წერს, რომ როგორც ჩანს, უკრაინა აძლიერებს თავდასხმებს რუსეთის სამხედრო, ლოჯისტიკურ და სხვა მნიშვნელოვან ობიექტებზე ოკუპირებულ უკრაინასა და რუსეთში.
ISW-ი მიუთითებს უკრაინის სამხედრო დაზვერვის მიერ გავრცელებულ ინფორმაციაზე, რომლის თანახმადაც 11 ნოემბერს უკრაინელი პარტიზანები თავს დაესხნენ რუსეთის სამხედრო შტაბს ოკუპირებულ მელიტოპოლში, ზაპოროჟიეს ოლქში, რის შედეგადაც დაიღუპა რუსეთის „ეფესბეს“ და როსგვარდიის სულ მცირე სამი ოფიცერი.
ანალიტიკოსები აღნიშნავენ, რომ უკრაინის სამხედრო დაზვერვის განცხადებას წინ უძღოდა უკრაინელი პარტიზანების თავდასხმა ლუგანსკის სეპარატისტული რესპუბლიკის სახალხო მილიციის ყოფილ ხელმძღვანელზე 8 ნოემბერს; დარტყმები რუსეთის სამხედრო ბაზაზე ოკუპირებულ სკადოვსკში, ხერსონის ოლქში და შავი ზღვის ფლოტის ობიექტებზე – ყირიმში 9 ნოემბერს; სამი დარტყმა ზურგში და პარტიზანული თავდასხმა რუსეთში 11 ნოემბერს.