უკრაინის პროკურატურის ცნობით, უკრაინაში რუსეთის თავდასხმის შედეგად 508 ბავშვი დაიღუპა.
საუბარია 2022 წლის 24 თებერვლიდან 2023 წლის 23 ოქტომბრამდე პერიოდზე. ამავე პერიოდში ომის შედეგად 1138-ზე მეტი ბავშვი დაშავდა.
პროკურატურის ცნობით, გუშინ, 22 ოქტომბერს, ხარკოვის ოლქში, კუპიანსკში, რუსული არმიის მიერ დაბომბვის შედეგად 15 წლის გოგონა და 17 წლის ბიჭი დაიჭრა.
უკრაინაში ომის შედეგად ყველაზე მეტი ბავშვი დონეცკის, ხარკოვის, ხერსონის, კიევისა და ზაპოროჟიეს ოლქებში დაშავდა.
ეს რიცხვები საბოლოო არ არის, ინფორმაცია მსხვერპლისა და დაშავებულების შესახებ ჯერ ისევ ზუსტდება, რადგან უკრაინის ქალაქებსა და სოფლებში აქტიური საომარი მოქმედებები მიმდინარეობს.
ასევე, ამ მონაცემებში არ შედის ქალაქ მარიუპოლში დაღუპული და დაშავებული ბავშვების სტატისტიკა, რადგან მარიუპოლი ოკუპირებულია რუსეთის მიერ და ინფორმაციის დაზუსტება შეუძლებელია.
რუსეთ-უკრაინის ომი 2022 წლის 24 თებერვალს, კიევის დროით დილის 5 საათზე დაიწყო. რუსეთის შეიარაღებული ძალები სახმელეთო, საზღვაო და საჰაერო გზით დაესხნენ თავს უკრაინას.
__________
ფოტოზე: ბაბუა რუსეთის დაბომბვისას დაღუპული 9 წლის შვილიშვილის ცხედრის წინ. 1-ელი ივნისი, 2023 წელი. ფოტო: EPA-EFE/SERGEY DOLZHENKO