უკრაინული მედიის ცნობით, დონეცკის ოლქის ქალაქ ავდიივკაში უკვე მეოთხე დღეა მძიმე ვითარებაა: რუსული ძალები ინტენსიურად ბომბავენ ქალაქს და ჯავშანტექნიკით მიიწევენ წინ, თუმცა უკრაინელი ჯარისკაცები პოზიციებს არ თმობენ.
ავდიივკას სამხედრო ადმინისტრაციის უფროსმა, ვიტალი ბარაბაშმა საინფორმაციო მარათონის ეთერში განაცხადა, რომ ბრძოლა სასტიკი და უწყვეტია, მუშაობს არტილერია და ავიაცია, ამ დღეებში ასობით შეტევა განხორციელდა:
„თავდასხმები არ წყდება არც დღე და არც ღამე, რუსები ტარაკნებივით მოძვრებიან, ძალიან ბევრნი არიანი“.
ბარაბაშის თქმით, ოკუპანტებს სურთ ავდიივკას ალყა შემოარტყან, მაგრამ უკრაინელი ჯარისკაცები 4 დღეა უცვლელად იცავენ პოზიციებს.
ავდიივკაზე თავდასხმის შესახებ წერენ ტელეგრამის პრორუსულ არხებზეც, სადაც აღნიშნავენ, რომ რუსული არმია ახორციელებს უკრაინული პოზიციების ყველაზე მასიურ დაბომბვას ბოლო თვეების განმავლობაში.