„ვაგნერის“ დამფუძნებელმა, ევგენი პრიგოჟინმა დღეს, 5 მაისს, მორიგი ვიდეომიმართვა გაავრცელა. პრიგოჟინი იმუქრება, რომ 10 მაისს „ვაგნერს“ გაიყვანს ბახმუტიდან.
„ოფიციალურად მივმართავ გენერალური შტაბის უფროსს, თავდაცვის მინისტრს, მთავარსარდლობას და რუს ხალხს.
„ვაგნერის“ მებრძოლების სახელით, „ვაგნერის“ სარდლობის სახელით ვაცხადებ, რომ 2023 წლის 10 მაისს ჩვენ იძულებულნი ვართ ბახმუტში პოზიციები გადავცეთ თავდაცვის სამინისტროს ქვედანაყოფებს და „ვაგნერის“ დარჩენილი ნაწილი გავიყვანოთ ბანაკებში ჭრილობების მოსაშუშებლად.
მე გავიყვან „ვაგნერს“ ბახმუტიდან, რადგან საბრძოლო მასალის არარსებობის შემთხვევაში, ისინი განწირულნი არიან უაზრო სიკვდილისთვის.
ჩვენ დაგვრჩა ასაღები 2-ზე მეტი კილომეტრი 45-დან, მაგრამ თუ თქვენი შურის გამო არ გინდათ რუსებს აჩუქოთ ბახმუტის აღებით გამოწვეული სიხარული, ეს თქვენი პრობლემებია“ – განაცხადა პრიგოჟინმა.
ვიდეომიმართვაში პრიგოჟინი ამბობს, რომ მის დაჯგუფებას საბრძოლო მასალების ხელოვნური დეფიციტი შეუქმნეს რუსეთის სამხედრო ბიუროკრატებმა. იგი ასევე ამბობს, რომ მიუხედავად იმისა, რომ საბრძოლო მასალა აღარ აქვთ, ისინი ადგილზე დარჩებიან 10 მაისამდე.
ამ მიმართვამდე პრიგოჟინმა გვამების ფონზე გამოაქვეყნა ვიდეო, რომელშიც მან, ფაქტობრივად, აგინა რუსეთის თავდაცვის მინისტრს სერგეი შოიგუს და რუსეთის გენერალური შტაბის უფროსს, გერასიმოვს.
განახლებული ინფორმაცია: პრიგოჟინის განცხადებას დღესვე გამოეხმაურა უკრაინის შეიარაღებული ძალების პრესსამსახური. უკრაინული მხარის განცხადებით, „ვაგნერს“ არა საბრძოლო მასალები, არამედ მებრძოლები ამოეწურა და პრიგოჟინი იძულებულია ეძებოს მიზეზი ფრონტის ხაზიდან უკან დახევის გასამართლებლად.
ბახმუტისთვის ბრძოლა ცხრა თვეა, გასული წლის აგვისტოდან გრძელდება. მიუხედავად ეტაპობრივი წინსვლისა, რუსული ძალები ვერ ახერხებენ ქალაქის სრულად აღებას. ამ დრომდე ბახმუტი რჩება უკრაინის ფრონტის ყველაზე ცხელ წერტილად, ორივე მხრიდან დიდი რაოდენობით მსხვერპლით.
ამავე თემაზე:
https://batumelebi.netgazeti.ge/news/477352/
