ორი დღის განმავლობაში მეორე აფეთქება მოხდა და ხანძარი გაჩნდა კრასნოდარში, ილსკის ნავთობგადამამუშავებელ ქარხანაში – წერს რუსული მედია.
ხანძრის გამომწვევ მიზეზად კვლავ უკრაინული უპილოტო საფრენი აპარატის თავდასხმა სახელდება.
რუსული მედიის ცნობით, დრონი თავს დაესხა ილსკის ქარხნის ტერიტორიას, რის შედეგადაც ხანძარი 60 კვადრატულ მეტრ ფართობზე გაჩნდა. „უკრაინულმა უპილოტო აპარატმა ნავთობგადამამუშავებელი ქარხნის ერთ-ერთი ბლოკი დააზიანა“ – წერს „კომერსანტი“.
უკრაინულ მხარეს აღნიშნულთან დაკავშირებით კომენტარი ჯერ არ გაუკეთებია. ხანძარი ლიკვიდირებულია, წინასწარი მონაცემებით, მსხვერპლი არ არის.
გუშინ, 4 მაისს, გამთენიისას, სამხრეთ რუსეთში ორ ნავთობგადამამუშავებელ ქარხანაში ერთდროულად გაჩნდა ხანძარი. ხანძრის გამომწვევ მიზეზად რუსული წყაროები უკრაინული დრონების თავდასხმას ასახელებენ.
